Plastic nokdangtsü atema Kohima nung DTF senden amen

Kohima, August 28 (TYO): ‘Restricting Use of Plastics’ indang Kohima District Task Force Committee senden August 28, 2019 nü Deputy Commissioner Office takdang nung menogo, ta ketdangsertem osang ka ajanga metetdaktsü.
Sorkar tetuyuba nung ajemdaker October 1 nungi tenzüka district aser state rangben nung Plastic nokdangtsü aliba atema asalentong yanglutsü atema iba senden ayongzüka amen.
Deputy Commissioner aser DTF Chairman, Gregory Thejawelie-i züngsemtem dang plastic nokdangtsü atema sorkar tetuyuba aser telatetbatem indang nenshia ametetdaktsüba den külemi züngsemtem dang district nung iba maparen takok ngua inyaktsü atema ayongzük.
Paisa, iba mapatong ya Nagaland nung dang masü saka India tesem ajakalen inyaker, iba dak alia Kohima ajanga state rangben noksa sayur asünungji district nung iba mapatong ya takok ngua inyaktsüla, aser iba atemaji stakeholders ajak longjemer inyaktsü nüngdak, ta metetdaktsü.
Iba dak sendakba nung pai, district nung iba maparen junga inyaktettsü atema district administration aser Kohima Municipal Council (KMC) dak alia committee-i Kohima Chamber of Commerce and Industry (KCCI), Angami Mechü Krotho (AMK), Angami Youth Organisation (AYO) aser Kohima Village Youth Organisation (KVYO) ayongsemogo, ta metetdaktsü.
Paisa administrative ketdangsertem dang iba maparen inyaktsü atema peipei sub divisional level nunga committee kaka tentettsü metetdaktsü.
Senden nungsa iba onük dak sendakba nung ita ka tsüngda jenjang balala aser sabang balala nung sensitization programme ayongzüka agitsü lemtet.
DC-i sub-divisional level nung administrative ketdangsertem aser stakeholders ajak dang iba maparen ya süoki ia agitsü aser peipei tesem nung nisung ajak nem iba awareness agüja angatetdaktsütsü mepishia metetdaktsü.
Senden nung Office Secretary KMC, Zakie Kiso-i tang tashi nung inyaka aruba osang metetdaktsü. AMK President, Kevinourheno Seyie; KCCI President, Medozhatuo Rutsa aser KVYO President, Dzuvinguzo Mepfhuo nungeria parnok tebilemba onüktem lemsatepba den külemi peipei tesem nung inyaka aruba osang metetdaktsü.
Parnokisa iba mapatong atangji nung takok ngua inyaktettsü atema akokba tashi nungita yaritsü, ta metetdaktsü.