NSCN(R)-i züngsem 2 jendoker

Dimapur, August 28 (TYO): NSCN/GPRN (Reformation)-i ozüng alema inyakba mapatem majungshir aser magizüker, aser Naga nunger ajak den külemi August 16, 2019 nü tapayutsü taküm ka laluba atema kanga sasar, ta MIP (Ministry of Information & Publicity)-i tanü metetdaktsüogo.
NSCN/GPRN(R)-i tasür kibong den asükhu lemsateper, ta MIP-isa ashi.
“Menden tulu mesüra tila nung aliba züngsem shiba südir süaka NSCN-i merenshitsü ta taoba mapang shiogo, saka National Ahza aser Party Discipline nung aliba ama, NSCN-i President tetuyuba nung ajemdaker August 28, 2019 nü Extraordinary Emergency Joint Council Meeting ka amen” ta MIP-i sangdong ka nung ashi.
Senden nung adenertemi züngsem ana- Khekato Kinny, Defence Kilonser cum UT1 Supervisor aser Chungshi Longkumer Deputy Kilonser na temalen shia aliba mapa nung shilem agiba bushitet. Anungji, teloki lemtetba ama President-i tena NSCN(R) nungi jendoker, ta MIP-isa ashi.
Tanüngba nisung asem (Tali, Nungsang aser Vishiho) nungerjibo ozü züngsem masü, anungji NSCN-i parnok atema telemtetba magitettsü, ajisüaka parnok nem temerenshi agütsütsübaji ozüng amertem aser ketdangsertem ket nung dang lir, ta MIP-isa metetdaktsüogo.