Manipur nung dengue tashidak bulur

Guwahati, Aug. 30 (Agencies): Manipur nung kaketshir trok dak tetendangba aika agiba sülen dengue tashidak putetogo, ta Manipur health & family welfare department Director, Dr K Rajo-i metetdaktsü.
“Kaketshir trokji Imphal East district nung aliba Sainik school indang hostel nung alir, aser parnok dak tetendangba aiben agiba sülen dengue tashidak putetogo,” ta Dr K Rajo-i metetdaktsü.
State nung kaketshir trokji densema nisung 100 dak tema dak dengue tashidak putetba sülen Hokolbarnü Manipur Health Services Authority-i, “State nung dengue tashidak bulua kümdar. Iba tashidak den külemi chikungunya, malaria aser zika ama tashidaktem nokdangtsü nüngdaker,” ta metetdaktsü.
“Merlai iba tashidak alir ka dak metepba sülen iba tashidakji menazüka tangar nema menaloktsür. Dengue atema antiviral treatment mali ajisüaka item tashidak temaitsü alirtem yaria anepalur,” ta Dr Rajo-i metetdaktsü.
Paisa nisungtem dang akok tashi merla nem memetepdaktsütsüla, talisa anepongi mesüra anü talui merla anem memetepdaktsütsüla, ta metetdaktsü.
Dr Rajo-isa nüburtem dang mejangdang merla-sü amshitsü metetdaktsü.