US Open round tasembuba Gauff o Osaka na asayatsü

New York, Luroi/August 30, 2019 (Agencies): Tang tasayidak aliba US Open asayamung Brehostibarnü tetsür kija asaya round tanabuba nung Japan tsür Naomi Osaka-i takok anguba sülen, Honibarnü round tasembuba nung lai America tsür Coco Gauff den asayatsü jangjaogo.
Brehostibarnü tetsür kija asaya round tanabuba nung arishi küm 21 tain Japan tsür Osaka-i Poland tsür Magda Linette madak 6-2, 6-4 agi takok ngua liasü. Ano külen, tetsür kija asaya tanga ka nung arishi küm 15 tain America tsür Gauff-i Hungary tsür qualifier Timea Babos madak 6-2, 4-6, 6-4 agi takok ngua asayamung round tasembuba tongteta liasü.
“Künaprongla (Osaka aser Gauff) lanur dang lir saka asaya nung ni tera tasenba lir. Ibayongji, Osaka den asayatsü asoshi ni yongyaseter,” ta Gauff-i ashi.
“Atangji nunga ni iba asaya takok nguner. Iba tetoktepba nung ni pelashishia aser tajungtiba nung shilem agia asayaner. La den court nung asayatsü asoshi yongyar,” ta Gauff-i ashi.
Osaka ya Australian Open champion lir aser lai taoba ita Wimbledon asayamung nung mezüng shilem agila, Gauff, shibai Venus Williams tsükdaktsü, ka den asayatsü jangrar.
“Nisung kari tangar indang jembitsüba ni kodang angashidir, ni itemji kü sasa asadangtsü atema parnok denji asayatsü asoshi maongka nguner,” ta Osaka-i ashi.
1966 küm Russia tsür Kourkoniva sülenbo US Open asayamung last 32 tongtetter rongnung Gauff tanutsütila asütsü.
Hokolbarnü külem asayar Caty McNally den longjemer tarep asaya nung shilem agiba ajanga Osaka den asayatsü asoshi ni tali dang renemshitsü maongka angutsü, ta Gauff-i ashi.
“Tennis tarep asaya atema ni shisamebulur. Asayamung shia nung tarep asayatsü asoshi maongka ngura, ni mulungsoa asayar. Kechiyong tarep asaya yimya kü atema balaka lir,” ta Gauff-i ashi.
“Tarep asaya nungbo tetokteperi züklotsüba ball timba nokdangtsüsa/meyipa zükloktsütsüsa akümer. Ibayongji Naomi den asayatsü asoshi tarep asaya ya ni atema renemshiba sabang ka ama ni bilemer, kechiyong kü atema kija asaya dang nungibo tarep asaya yimya takaraba ama ni bilemer. Anungji, Osaka den Honibarnü asaya atema tarep asaya yagi temelenshi tuluka adokdaktsütsü ni imlar,” ta Gauff-i shisem.
Tan ita tetenzüklen Washington WTA asayamung tetsür tarep asaya final nunga McNally aser Gauff nati takok ngua liasü.
Taoba küm ana tejakdang Miami Open asayamung asoshi Osaka renemshiba mapang world no 140 nung alila Gauff densema liasü.
“Court nung ni ball inoktsütettsüsa asaya aser iba mapang Naomi matsüngdang ni kanga dang nüma-matangtetti asaya. Asayamung ka atema Naomi renemshia asaya asünung ni tajungtiba asayatsü merang,” ta Gauff-i ashi.
Maneni, kasa asayamung tetsür kija round tanabuba asaya tanga ka nung Wimbledon asayamung takok angula Simona Halep tia makai America tsür Taylor Townsend-i 2-6, 6-3, 7-6 (7/4) agi tsükdakja liasü.
“Iba asaya koktetba ya kü atema maongka onsara tulu lir. Iba jenjang ajangzüktettsüsa ni mapang talangka nungi meranga asaya aruogo,” ta 2014 küm French Open asayamung round tasembuba tashi atongla Townsend-i temulung raksa ashi.