Minister Along-i Union Minister 2 den ajurutep

Dimapur, September 4 (TYO): Tanü Higher Education, Technical Education & Tribal Affairs Minister Temjen Imna Along-i New Delhi nung Union Minister of Tribal Affairs Arjun Munda den ajurutep, ta Kuolie Mere, PRO (IPR) Nagaland House, New Delhi-i sangdong ka nung ashi.
Iba mapang Minister Along-i Union Minister dang Nagaland nung tribal affairs dak sendakba mapa balala inyaktsü aliba osang lemsatep aser pa dang nungi teyari meshi.
Department of Tribal Affairs-i Kohima nung Directorate Building aser Mokokchung o Tuensang nung Mini Directorate ana yanglutsüba indang Concept Notes renem aser ibaji tanü Arjun Munda nem agütsü.
Minister Along-isa Union Minister Munda dang September 6 nü Nagaland University indang Silver Jubilee amungtsü aliba osang lemsatep. Iba sentong nung Munda-i alakteta jaoker ka ama shilem agitsü lir.
Tanü Minister Along-isa Union Minister of Human Resource Development Dr. Ramesh Pokhriyal Nishank den ajurutep.
Iba mapang pai Union Minister den Higher and Technical Education Department tem indang osang lemsatep aser state yaritsü atema ayongzük.
Senden nung Union Minister Dr. Ramesh-i Northeastern region aser Himalayan States atema conclave ka Kohima nung ayonga amungtsü aser idangji New Educational Policy indang shisalemsateptsü ta asüba tebilemba ka lemsatep.
Paisa Ministry ketdangsertem dang State sorkar den yariteptsü aser senotsü tagütsütsü aliba ajak agütsütsü atema tetuyuba agütsü.
Minister Imna Along-i mepishiba ama Nagaland nung professional college 2 lapoktsü atema bilemdangtsü ta HRD Union Minister-isa ashi.
Dr. Ramesh-isa Nagaland nung Government College 17 nem infrastructure grants agütsütsü nangzükba den Kohima Science College nung weather research nung akokba tashi yariteptsü ta nangzük.