Dimapur nung NRC aser ILP atema shisalemsatep

Dimapur, September 4 (TYO): Bodbarnü Dimapur nung National Register of Citizens (NRC) aser Inner Line Permit (ILP) tenzüktsüba dak sendakba onüktem lemsateptsü atema senden ka menogo.
Senden nung Nagaland Chief Minister Neiphiu Rio, Dy. Chief Minister Y. Patton, Chief Secretary Nagaland Temjen Toy aser tanga tongti ketdangsertemi Dimapur Sardar nung wards/ villages aser temeket aliba yimtsüngtem nungi chairmen aser GBs den shisalemsatepa liasü.
“Dimapur ya India tila ka mesüka lir aser Nagaland nung shishilembadak tongti tesem lir. Dimapur nung chichiba senso aser ano taitsü aketba nisungtem lir. Anungji Dimapur tajungba kümdaktsütsübaji sorkar kijai meinyaktettsü saka nübortemi shilem agitsüla,” ta tanü Neiphiu Rio-i ashi.
RIIN mapa tenzüktsü atema mapang agitsü kechiyong teinyaktsü aika reprangshimtsüla. Ajisüaka, Dimapur nung tetsükdaktsü majurutsü atema ILP mapa tenzüktsüla ta bilemer. Dimapur ya ozüng alema mapa inyakertem alidak ka kümogo aser taitsü aketba nisung aika Dimapur nung arua alir, ta paisa ashi.
Item tebilemtsütem atema teküpoktiba jenjang nung mapa inyakba lennirtemi sorkar den amalitepa yariteptsüla. GBs ya sorkar atema teshimtet nübotem lir anungji nenoki Nagaland tarutsü tajungba kümdaktsütsü atema nendaka inyaktsü mepishir, ta Nagaland chief minister-isa ashi.
“ILP mapa inyaktsübaji lokti nung teküpoktiba jenjang nung lennirtem dak keta lir. Nenoki pei pei telongtet nung ozüng alema arurtem jangjatsüla. District administration aser police-ia ozüng alema arurtem noktangtsü atema ILP akangakanga mittsüla” ta Rio-isa metetdaktsü.
Paisa, Citizen Amendment Bill indang jembidang “CAB 2016 ya Parliament nung benok aser January 8, 2019 nü Lok Sabha nung agizük” ta ashi.
“CAB ya agizüka mapa tenzüka ao nunga Naga loktiliba atema timtem kecha magütsütsü, kechiyong Naga nungertem Arrla 371(A) kübok kümzüka lir. Iba ya 16th Point Agreement ajanga latetba Arrla ka lir. Naga nungertemi longjemer ola ka dang adoktsüla” ta Chief Minister Rio-isa ashi.
Senden nung Deputy Chief Minister, Y. Patton-i o jembidang “RIIN, ILP aser NRC onüktem ya tongti süa bilemtsüla” ta ashi.
August 31, 2019 nü National Register of Citizens (NRC) sayaba sülen Assam den kidanger state tem asoshi tebilemtsü bener arutsüogo. Assam nung NRC sayaba sülen Mizoram, Meghalaya state temi parnok arrtsütem shibangogo kechiyong nisungtemi Assam toktsür tanga state temi aotsü akok ta tarendakba ka lir, ta Y Patton-i ashi.
Dimapur Sardar aser meketa aliba yimtsüngtemi Assam den arrtsüa lir. Anungji Dimapur district administration aser Police-i taitsü aketba nisungtem Nagaland state-i marudaktsütsü atema jungjunga nüka mittsüla, ta paisa ashi.
“Asen state telungi ozüng alema arurtem marudaktsütsü atema asenok ajaki shilem agitsüla. Wards aser village council nung Chairmen aser GB temi pei pei telongtet nung alirtem indang maitsü jangjatsüla aser meteta alitsü tim” ta Dy, CM Patton-isa metetdaktsü.
PHED Minister, Jacob Zhimomi-ia GBs aser Chairmen ajak longjemtsü aser ozüng alema nisungtem aruba tebilemtsü koktettsü atema ayongzük.
“Naga sobaliba ama nenok ya ozüng yanglurtem lir, anungji tai tongloktsüba anener pei pei wards/yimtsüngtem atema nendaka inyaktsü ayongzüker” ta Jacob-isa ashi.
Senden nung mendenji Nagaland Chief Secretary Temjen Toy liasü aser senden nung adenba GBs/ Chairmen-i Neiphiu Rio-i anir sorkari Dimapur nung senden ayonga amenba atema pelaba metetdaktsü.