DFL: SM College aser One Ten na draw asü

Dimapur, Rongjui/September 10 (TYO): Tang tasayadak Dimapur Football League (DFL) Season – 2 anogo 8buba mezüngbuba asaya nung SM College aser One Ten nati goal anana agütsür asayar draw nung tembang.
Asaya nung mezüngbuba goal One Ten nungi asayar Mantho-i (jersey no 5) minute 13buba nung idaktsü aser Zachamo-i (jersey no 17) minute 29 buba nung tanabuba goal idaktsü. Iba sülen asaya tanabuba shilem nung SM College nungi asayar Rhitsho-i (jersey no 9) minute 65buba nung par telok asoshi mezüngbuba goal idaktsü aser Kakai-i (jersey no 17) minute 68buba nung tanabuba goal idakja asaya goal kasasa nung tembang.
Tanü asaya nung match patron ji Dimapur Naga Students’ Union tir, Sedevilie Angami liasü. Sentepa aliba lokti den jembiba mapang Sedevilie-i ashiba agi, DNSU-i saisapong balala nung sempet aketba lanur asayartem atema süokia bilemer ta ashiba den state nung infrastructure peria maliba ajanga item lanurtem majungkettetba atema nemjema bilemba lemsatep. Sedevilie-i state sorkar dang Dimapur nung state stadium takaratiba nung rementsü asoshi mepeshiogo. Maneni DNSU tir-i, Naga United FC-i DFL ayongzüka lanurtem nem parnok sempet sayatsü asoshi maongka agütsüba atema pelaba lemsatepa liasü, ta DFL Convenor Shiyeto Wotsa-i sangdong ka ajanga metetdaktsü.
September 11 nü asaya yamai alitsü:
A1 Powerplay vs Burma Camp FC (3:30 pm)
One Ten vs Chanan FC  (6:00 pm)
Tribal United vs Aphuyemi FC (7:50 pm)