Mkg nung state level science seminar takok ngua agiogo

Nagaland State Level Science Seminar tetoktepba nung takoker par asem nem senpet agütsür külen education department nung ketdangsür kar densema noksa nung angur. Mokokchung, September 11, 2019.

Mokokchung, Sept 11 (TYO): District Education Officer Mokokchung den yaritepa Directorate of School Education Nagaland Kohima-i ayongzüka ‘Nagaland State Level Science Seminar-2019’ sentong “Periodic Table of Chemical Elements: Impact on human welfare” onük nung ajemdaker yangi Mokokchung town hall nung takok ngua kaogo. Iba science seminar tetoktepba nung Nagaland kübok district shia nungi kaketshir 11-i shilem agia liasü.
Taküm iba seminar tetoktepba nung Mon district tenüng nung shilem agila Sacred Heart School nungi Kr. Shangmeth M. Konyak-i mezüngbuba jenjang nguteta liasü aser lai 100 marks nungi 87.1 angu. La den atonglaji Kohima district tenüng nung shilem agir Baptist Mission School Jotsoma nungi Kr. Kelhule Nagi liasü aser lai marks 85.6 angu aser Mokokchung district nungi Jubilee Memorial School nungi Kr. Komal Haokip Chaurasia-i tasembuba jenjang ajangzük aser lai marks 85.5 ngutet. Tetokteper ajaki projector amshia power point presentation yimya nung shilem agia liasü.
Mezüng jenjang angur nem senpet sen 10,000/- aser tanabuba nem 7000/- aser tasembuba nem 5000/- agütsü aser parnok ajak nem frame inoka yangluba kulikaket tajung kaka agütsüogo. Iba den külemi tetokteper ajak nem shilem agiba tamaitsü kuli kaket kaka agütsü. Iba tetoktepba nung tetendangertemji; Fazl Ali College nungi tesayur Dr. Imliwati Lkr, Mayangnokcha GHSS nungi PGT Wapang Mollier aser Mayangnokcha GHSS nungisa PGT Aotsüngba par asem liasü.
Tanü iba sentong nung Mokokchung Deputy Commissioner, Rajesh Soundararajan IAS guest speaker ka ama arua “Periodic table of chemical elements: Impact on human welfare” onük nung ajemdaker tebilemba kar bener arua tesentepertem den lemsatep. Sentong nung Dy. Director (DSE) Limadangit Jamir, Mokokchung DEO Sademmongla, ADEO Satemkala aser Mayangnokcha GHSS Principal Sentinenla parnokia shilem balala agia liasü. Edith Douglas HSS kaketshirtemi ken tajung ka tena tesentepertem peladaktsü.