NDA nung adenertemi Hindutva tangatetba agizüktsüla

Mumbai, September 11 (Agencies): BJP-Sena indang National Democratic Alliance-i mezüng Hindutva tangatetba pusemtsüla ta tanü Shiv Sena MP Sanjay Raut-i ashi.
Maharashtra assembly elections agitsüba jakdang yimsüsür aikati political party ka toktsür tanga nung adenba atema Raut-i iba olen jembi.
“Onok den arua adentsü sentong atongertemi, temulung ajak agi Hindutva tangatetba agizüktsüla. Kechiyong onok indang kishi ya MP, MLA mesüra minister kümnürtem atema dang lapoktsüba masü” ta paisa shisem.
“Onoki Hindutva tangatetba ya linük aser state nung prokshidaktsünür. Anungji, parnoki kasa tangatetba nung onok den denra, onoki parnok mulungsoa agizüktsü” ta Shiv Sena lennirisa ashi.
Taoba hopta ishika tsüngda Maharashtra nung opposition lennir aika BJP nung denogo.
BJP nung adenertemji Congress nungi Radhakrishna Vikhe-Patil aser Kalidas Kolambkar aser Nationalist Congress party MLA tem- Shivendrasinh Bhosale, Sandip Naik aser Vaibhav Pichad nungertem lir.
Parnoki BJP nung adenba ajanga taküm küm tatemlen Maharashtra assembly elections agitsü aliba nung opposition tashimait kümdaktsüogo ta jembir.