Assam BJP-i PM Modi tasoba anogo tenüng nung ‘Seva Saptah’ amongtsü

Guwahati, September 13 (Agencies): Assam nung Bharatiya Janata Party (BJP)-i ‘Sewa Saptah’ ta ser hopta piyong sentong ka agitsü.
BJP central committee-i September 17, 2019 nü Prime Minister Narendra Modi indang tasoba anogo amongtsü tuyuba nung ajemdaker parnoki iba sentong agitsü.
September 14 nung 20, 2019 tashi Assam kübok tesem balala nung iba sentong agitsü, ta BJP president Ranjeet Kumar Dass-i ashi.
Union Home Minister Amit Shah aser BJP working president JP Nadda nati Modi’er tasoba anogo ‘Sewa Saptah’ ta ser amongtsü lemtetogo ta September 12, 2019, BJP national general secretary Arjun Singh-i metetdaktsü.
Tanü Barpeta nung osangbener den jembidang Dass-i “Iba sentong nung BJP züngsem lakh 42-i shilem agitsü. Parnoki merükmejuba mapa aser azü tenlaba sentongtem dena tanga sentong aika ayonga agitsü. Parnok dang polythene melena jute bags amshitsü tuyuogo” ta ashi.
Asenoki nübortem dang merükmejutsü aser plastics mamshitsüba osang prokshitsüla. Asenoki tangar memenep. Iba asoshi mapa inyaktsü nüngdaker, ta paisa ashi.
“Congress party ya süitemogo aser parnok tangatetba kecha mali. Parnok sasep nung obang meputep lir. Taoba Assam Chief Minister Tarun Gogoi aser Barpeta MP Abdul Khalque nati jembiba meputep” ta Dass-isa metetdaktsü.
Gogoi-i final National Register of Citizens nung aibelen aika lir ta ashir saka Khaleque-ibo iba ya Assamese nunger atema tongtipang mapa ka ta shiogo, ta Assam BJP president-i ashi.