Tripura nung chuba jala Kamalprabha Devi süogo

Agartala, Sep 12, 2019 (Agencies): Tripura deputy CM Jishnu Devbarma tetsü Maharaj Kumari Kamalprabha Devi Brihostibarnü asü.
Kamalprabha Devi ya artist tajung ka liasü aser Assam kübok Nagaon nung lar jalar kidang lia la asü. La arishi küm 105 liasü.
“Kamalprabha Devi ji lar jala tanutsülar kidang liasü. La tain akümba agi timtem balala ajanga kangshia aru” ta Salil Debbarman-i ashi.
Kamalprabha Devi ya Tripura chubar kibong nung painter aser kentener ka liasü. Lai yangluba noksatemji India ajungalen chuba kibongtem nung kanga nüngtugu süa amshi.
“Lai sempet aika agizüka liasü” ta Debbarman-isa ashi.
La ya Birendra Kishore Manikya (1909-1923)’er jala aser Ramendra Kishore Dev Varma kinungtsü liasü. La kinungbo Ramendra ji Tripura nung Chief Secretary liasü.
Birendra Kishore Manikya ya arishi küm 26 asüdang November 1909 nung Tripura yimli nung chuba aküm.
Kamalprabha Devi-i jala asem aser jabaso ana toktsür asü. Tanurtem rongnung tanubosangji Tripura Deputy Chief Minister Jishnu Dev Varma lir.
Chief Minister Biplab Kumar Deb-i sangdong ka nung asükhu lemsatepdang, Kamalprabha Devi-i state indang sobaliba ajungkettsü atema shilem agibaji kodanga mesamatsü ta ashi.
La ya Tripura yimli nung tatembangba Chuba Maharaja Bir Bikram Kishore Manikya Bhahadur tenu tanutsüla lir.