Taküm Miss Mokokchung yimya balaka nung ayongzüktsü: MAAM

Sept. 18 : Mokokchung District Arts & Culture Council (MDACC) akhüm nung Mokokchung Arts & Aesthetic Management (MAAM) teloki taküma Miss Mokokchung 2015 sentong ayongzüktsü ta MAAM sangdong ka ajanga metetdaktsüogo.
Taküm balaka Mokokchung town quasquicentennial benjong amunger asünung, Miss Mokokchung sentongji yimya balaka aser tuluba nung ayongzüktsü terenemba lir ta maam-isa metetdaktsü.
MAAM-i yaküma miss Mokokchung sentong takok ngua ayongzüka agiogo aser iba nung jagi aruba tajangzüktemji Mokokchung nung aliba Imkongliba Memorial District Hospital (IMDH) nung cancer agi shirangertem nem teyari agütsü.
Taküma MDACC akhüm nung MAAM-isa Miss Mokokchung sentong ayongzüktsü aser iba nüngtem teyari lenmang bushia aser jili sentong ka ama ‘buffet’ ka tan September ita 22nd nü Town Hall Mokokchung nung ayongzüka lir.
“Yaküm Miss Mokokchung sentong ayongba mapang telok/nija aser lenla balalai yariba ajanga sentongren ajak takok ngua agiogo. Anungji, teyariteper ajak dang maneni pelaba lemsateper”, ta MAAM tir Wt. Asola Ozükümi metetdaktsü.
“Aji oda, taküma iba sentong tajungtiba ayongzüktsü ozü telok terenemba lir. Yimya agi ‘beauty pageant’ amala sentong ayongba nung ya rongsen jenti sentaka lir, aser kümshi tangar nema timtem magütsünüba agi takümbo buffet sentong ya ayonger”, ta laisa metetdaktsü.
Aji saka laisa ashiba agi, “Miss Mokokchung 2015 dak sentakba nung nija/telok kari danga yarinüra, ajibo nungnanga melii pela shishia agizüktsü”.
Iba buffet sentongji balaka asütsüsa achayangtsü merangtsü. Aji oda, awazürtemi aon tapu balala renema agütsütsü sentong lir aser ano osang tajung kaji; tarurtemi pei sasa pei chinüba barbecue wanga/tsüka achitsü maongka lapoktsütsü.
Ibai chiyungtepba sentong ka dang masü, saka nai iba nung shilem agibaji tamaren mapa inyakba nung shilem agir asütsü. Anungji, chiyungtsü saburtemi iba buffet nung arua shilem agitsü pela shishia jaoker ta parnokisa metetdaktsü.
Mokokchung Arts & Aesthetic Management telok nung zügsemtemji lenla balala nungi takutet dang senteper akümba lir aser parnok ya government registered telok ka lir. Parnoki ‘lanur aser tetsür temelenshi’ dak rangloker lokti nung maparen balala inyaka arudaki.