Mon DPDB senden nung LADP 2019-20 kübok project tem agizük

Dimapur, Rongjui/September 17 (TYO): September ita atema Mon District Panning and Development Board (DPDB) senden September 16 nü DC Conference Hall nung Deputy Commissioner & Vice- Chairman DPDB Mon, Thavaseelan K, IAS lenisüba kübok agiogo. Iba senden nung MLA N.Thongwang Konyak dena liasü.
Senden nung Mon district atema LADP 2019-20 kübok project tem agizük. N.Thongwang Konyak-i, LADP kübok project tem ya sorkari agizükogo, kong project tem tang aliba project tem dang nungi balaka lir, ta ashi.
Senden nungsa ketdangsertemi, Yuching yimtsüng nung Baptist School aser Tangnyu yimtsüng, Island Club register asütsü atema sorkar dangi abentsü agizüka ayu.
Area Operations Manager, Sumit Banerjee-i, India Post Payment Bank, Mon Branch tenüng nung powerpoint presentation ka agütsü. Pai ashiba agi, India Post Payment Bank (IPPB) ya Department of Post (DOP) kübok public Sector Bank ka ama amenokogo aser equity noklang nung noklang shilem India sorkar meyong lir. IPPB nükjidongji nisung ajaki amshitettsü, atutsüsa aser temulunglemtetba bank ka agütsütsü asoshi lir. Paisa, IPPB indang product offering; Deposit, Money Transfer, Direct Benefit Transfers, Third Party Products, Bill & Utility payments Enterprise aser Merchant payments nunger dak sendakba nung osang agütsü.
Board-isa, Sacred Heart School, Mon nungi class 9 nung azünger Shongmeth M Konyak nem tetushi agütsü, shibai State level Science Seminar nung mezüngbuba jenjang nguteta liasü. Maneni state nung Badminton asayar Unice, Yaom aser Leihong nunger nema state aser national jenjang nung asayamung balala nung takok tajung anguba atema tetushi agüja liasü. Board-isa Beti Bachao Beti Padhao kübok wadang balala nung District Icons teku shim.
Revised National Tuberculosis Control Programme (RNTCP) dak sendakba nung osang tatsüka Dr. Tinelo J Katiwa, DTO Mon-i agütsü, kong pai Mon district kübok RNTCP inyakyim metetdaktsü. Paisa, Nikshay Poshan Yojana dak ajemdaker jembi aser iba scheme kübok inyakyim tejangja metetdaktsü.
District Transport Officer, Arenbo Peter-ia, Vahan 4.0 & Sarathi 4.0 applications dak talisa rangloker department inyakyim balala metetdaktsü. Pai ashiba agi, Sarathi ya applicants tem, conductors’ licenses aser driving school licenses atema Driving licenses agütsütsüba lir aser Vahan ya gari tapu balala ajak atema registration certificates agütsüba lir.
Maneni senden nung ADC Mon Hiazu Meru-i district nung plastic bottle amshiba nokdangtsü asoshi tenzüktsü benok aser züngsemtem dang office nung solid waste management junga benoka inyaktsü mepeshia liasü, ta DPRO Mon sangdong ka ajanga metetdaktsü.