Kaketshirtemi merükmejutsü aser lipuküm kümzüktsü osang proktsüla

Kohima, September 17 (TYO): Kaketshirtemi merükmejuba aser lipuküm kümzüka ayutsüba indang osangtem prokshitsüla ta tanü Samagra Shiksha, Nagaland Mission Director, Kevileno Angami-i ayongzük.
Department aser telok balalai merükmejuba, temang tiptema ayuba aser lipuküm indang sentongtem ayonga agiogo saka asenoki iba ya yimya küma mebenshi nungbo nüngdak mali, ta laisa ashi.
Directorate of School Education nung Samagra-i Swachhta Pakhwada 2019 sentong ayonga agidang Kevileno-i iba osang metetdaktsü.
“Merükmejutsü aser lipuküm kümzüka ayutsüba indang osang ya kaketshirtemi prokshitsüla aser nenoki pei temeket memenentsü aser single use plastics mamshitsü indang yimya sübatsüla,” ta lai ayongzük.
Taintem dang süngdonglidong atsüngba anentsü ayongzüktsüla ta laisa shisem.
Sentong nung okila jembidang School Education Director, Wonthungo Tsopoe-i taküm anema alitsü atema merükmejuba ya kanga tongtipang lir aser iba ya ajak indang tebilemtsü lir, ta ashi.
Ministry of Human Resource Development-i tuyuba ama school aser shisaliok rejutemi Swachhata Pakawada inyaktsüla aser anepdang assembly nung Swachhata (cleanliness) indang jembitsüla, ta Wonthungo Tsopoe-isa metetdaktsü.
Iba sentong nung Nagaland Board of School Education Chairperson Asano Sekhose-i Samagra Shiksha Nagaland ajanga ayongzükba tetoktepba balala nung takokertem tem nem sempet lema agütsü.