Mizoram health minister-i health & wellness centre lapoktsü

Aizawl, Rongjui/September 19 (Agencies): Mizoram health and family welfare minister Dr R Lalthangliana-i Bodhbarnü Zembawk nung Health & Wellness Centre ka lapoktsüogo, koba urban primary health centre ka aliba nungi ajungketba lir.
Health centre lapokba sentong nung Jhpiego tir aser CEO Dr Leslie Mancuso dena liasü. Iba NGO ya Johns Hopkins University, Baltimore, USA nung züngoksema lir.
USAID-i senotsü teyari agüja Jhpiego pur Ayushman Bharat den longjemer link nung healthcare ajungketba nung shilem agir.
Dr R Lalthangliana-i healthcare sector nung Mizoram-i ajangtetba indang metetdaktsüba mapang ashiba agi, 2010 küm IMR 37 aliba nungi 2019 küm 15 tashi ajemogo aser NITI Aayog-i tawa sayaba health index nung state tilalatem rongnung Mizoram temaba jenjang nung lir, ta ashi.
Paisa, Mizoram-i point 74.97 ngutetogo koba Kerela (74.01) dang nungi timba lir, ta ashi. Kerela ya state tulutem rongnung temaba jenjang nung lir.
Paisa, healthcare tsütsü terenlok bener arutsü atema Department küm ana asem tsüngda ajangtettsü asoshi nükjidong yur lir.
Nükjidongtem rongnung IMR 10 teküboki bener alutsüba aser MMR 50 dak teküboki bener alutsü asoshi sentong lir. Maneni Sub Centre tem nung tanur abenertem sihilem 90 mangaoka ayutsü asoshi aser tanur noklang nung noklang immunize sütsütsü nükjidong lir.
Jhpiego tir aser CEO Dr Leslie Mancuso-i ashiba agi, lar NGO, alima nung public healthcare programme tulutiba Ayushman Bharat den longjemer inyaktetba atema nema danga bilemer aser Mizoram ya universal health care & coverage ajangtetba model state ka asütsü imlar, ta ashi.
Laisa, Jhpiego pur küm 40 tashi healthcare sector nung India sorkar den longjemer inyaktetba atema kanga pelaba lemsatep.
Ayushman Bharat kübok state nung sub centres, primary centres, urban primary health centres ajak 2022 tashi nungbo Health & Wellness Centres-i ajungkettsü.
Item centre tem ajanga jenjang temela agi healthcare services tajungtiba nüburtem nem agütsütsü meranger.