MBC-i ‘Children’s Recreational Event 2019’ ayongzüker

Dimapur, Rongjui/September 19 (TYO): School tanurtem sodi mapang nung südoksünema mongdaktsütsü nükjidong nung Mind Blowers Club (MBC)-i Dimapur nung “Children’s Recreational Event 2019” ta ser sentong tajung ka ayongzükogo.
Iba sentong ya October 6 nungi October 8 tashi DDSC stadium, Dimapur nung agitsü, aser iba sentong ya arishi küm 13 ser tekübok tanurtem atema lir; October 6 nikongdang 4:00 ako nungi Orphanage Home nungi tanurtem angati entry südaktsütsü, ta MBC-i metetdaktsü.
Tanüasüng tanurtem aika TV reprangba, video games asayaba aser phone amshiba nung mapang kanga indoker, saka kima-yimdong aser moapu nung mapang meindoker, ibayongji tanurtem moapu nung südoksünema kazüdaktsütsü nükjidong nung iba sentong ayongzük, ta parnokisa ashi.
“Saisapong ajak aser tetoktepba balala atema ticket ji tanur shia sen 500 asütsü, tanga ‘activity’ atemabo noklang kaka tali asütsü; iba dak alia tsüraburtembo angati asütsü. Naga nunger shishilembartem ajungmesotsü atema sentong agiba tesem nung chiyungtsü stalls, nanglong aser kazütsü stalls lapoktsü,” ta parnokisa metetdaktsü.
Sentong nung art competition, bouncing jumbo, recreational park, pools aser karaoke alitsü; anogoshia tetoktepba balala nung takok angurtem nem sempet agütsütsü, ta kasa sangdong nung shia lir.
Iba sentong atema tickets ji ICST & Abacus (Chumukedima), Little Store (4th mile junction, Gadgets Spa (opp ECC Padumpukhuri), Little Store (Super Market), Candy House (Duncan), New Card Shop (Church Road) Shopping Arcade aser Fine Things (Circular Road) nung angutsü.