DC-i Plastic Free Zunheboto atema ayongzüker

Zunheboto, Rongjui/September 23, 2019 (TYO): World Clean-up Day den repsema International Peace Day sentong ka September 21, 2019 Honibarnü Zunheboto nung ayongzüka liasü, ta DPRO sangdong ajanga metetdaktsü.
Mahatma Gandhi sor küm 150 ajungba benjungmung maitsü sayutsü nükjidong nung Cornerstone Bharat Scouts & Guides-i iba sentong ayongzüka liasü.
Sentong nung Deputy Commissioner & District President NBSG, Peter Lichamo-i jembiba mapang Nagaland nung Zunheboto ya plastic free district kümdaktsütsü asoshi nüburtem dang mepishi aser plastic arongba ajanga tzü-mopung menentsür, ta shisem.
Peter-isa, sentong nung adenertem dang kidang, school aser office nunger nung plastic amshiba anentsü asoshi tajungshiba agütsü aser district ya ‘Pollution Free Environment’ kümdaktsütsü asoshi district administration-i inyakdar, ta metetdakja liasü.
Kaketshirtemi pei kidang, school aser medemertem den yimjung yanglutsü aser district nung yimjung meimba nisung ka ka akümtsü asoshi Peter-isa mepishia liasü.