NE nung drone ajanga mozü belentsü

Shillong, September 24 (Agencies): Northeast nung connectivity shitak maliba ajanga nisung aikati timtem ajuruba den medical personnel peria maliba aser medical supplies shitak manguba khurettem lir.
“Tanü asenok alima lendong kanga atalokba putu ka nung alir aser kodang asenoki Northeast reprangdangdir, asenoki melamela lendong ajurutsü tia ka nung lir. Nübortem meta talanglang prokshia alir” ta North-Eastern Council (NEC) indang Planning Advisor, Calvin H Kharshiing-i tanü ashi.
“Tesentaktep junga maliba ajanga, lendong-tsüdong atalokdang meta talang pilar alirtem mapang shitak nung meyaritetba aser medical supplies & services magütsütetba khurettem lir. Iba jagi tanü onoki, Drone Technology dak rangloker. Iba ajanga taküm kümzükba mozütem abentsü, nüngdak mapang azü dena abentsü” ta Kharshiing-isa ashi.
Meghalaya nung NEC-i NEIGRIHMS den yaritepa meta talang pilar aliba tesemtemi medical supplies yoktsü, ta paisa ashi.
“Northeast kübok tangalen inyaker asü masü’ar ni memetet saka Meghalaya nungbo tang mezüng atema medical supplies belenba mapa inyaktsü” ta paisa shisem.
NEC-i tanga state tem nung drone technology amshia tsünüsenbongtsü aser aluyimba dak sendakba osettem belener, saka medical supplies belentsübaji iba ya mezüng asütsü. Onoki iba mapa tenzüktsü shisadangdar aser Shillong nung mezüng atema inyakdangtsü. Iba atema Rs 10 lakh lemzüktsüogo, ta Kharshiing-isa metetdaktsü.
Tanga Northeast state tem nunga kasa mapa atema drone technology agütsüogo ta paisa ashi.
NEC-isa North East Space Application Centre (NESAC)-i Flood Early Warning System inyaktsü atema yarir. Iba nung satellite technology aser mobile app ajanga osang angutsü, ta paisa ashi.