Küm 3 tsüngda tashiyim agi sen sarur 501 apu

Dimapur, September 24 (TYO): Taoba küm asem tsüngda Dimapur Police-i tashiyim agi sen saruba ken o 338 tashi benokogo aser iba dak sendakba nung nisung 501 apu, ta Commissioner of Police, Dimapur Limasunep Jamir, IPS-i metetdaktsü.
Tanü osangbenertem den sensaksemdang Limasunep-i ashiba agi, ken o aika takoksa ajururtemi meshiaka benoka liasü.
Police Commissionerate, Dimapur kübok special police telok balalai ozüng alema sen sarurtemji puteta liasü, ta paisa shisem.
Iba dak sendakba nung apurtemji NNPGs züngsemtem, tiyongtsü nung mapa inyakertem, over ground teyaritepertem aser civilians lir. Police-i apuba nisungtem ket nungi Rs. 27.98 lakhs den prangpong-injangtem ngutetogo, ta Commissioner of Police-isa metetdaktsü.
NNPGs card holders dena züngsem aikati CFGR nung maongka agir ozüng alema sen sarur. Iba onük ya police headquarter aser chairman, CFMG dangi abentsü, ta paisa ashi.
Civil society tem aser sendaktepa alirtemi ozüng alema sen saruba azüoktsü atema tebilemtsütem lemsatepba atema pelar. Ajisüaka, civil society tem aser public-i iba khuret mita reprangdang, tensa rakatsüsa mapang ajurutsü akok anungji ajaki ozüng inyakyim rajema inyaktsü mepishir, ta paisa ashi.
Dimapur Police-i Superintendent of Police, Karbi Anglong teyari agia arrtsülen külemi mapa inyaktsü, ta Limasunep-isa metetdaktsü.
Zone I & II nung Deputy Commissioner of Police-i ashiba agi “ozüng alema sen sarusajiba onük atema police-i timtem aika ajurur, kechiyong takoksa angurtemi aiben police tsüngdang ken o o mebenoker.”
“Ozüng alema sen saruba azüoktsü atema sensotemi police den yariteptsü aser police nem osang sangoktsütsü atema mepishir,” ta ketdangserisa shisem.