SC-i Oct. 18 tashi nung Ayodhya ken o tembangtsü tuyur

New Delhi, Rongjui/September 26 (Agencies): Supreme Court nung Ayodhya nung ali mangatettep ken o anga arur anogo 32buba nung Chief Justice Of India (CJI), Ranjan Gogoi-i Hindu aser Muslim nunger dang iba ken o October 18 tashi nungbo tembangtsü tuyuogo.
Supreme Court-i telok anaprong dang mapang ka latettsüla mesüra iba ken o nung obendang magütsütettsü, ta metetdaktsü.
“October 18 tashi nung ken o metembangtetra joko anogo ka danga matsülangtsü,” ta SC-i metetdaktsü.
“Nenoki onok nem agütsüba (documents) nung ajemdaker hopta pezü tsüngda obendang agütsütetra ibaji tesüngmangtsüka asütsü,” ta SC-isa metetdaktsü.
Chief Justice, Gogoi taküm November 17 nü menden nungi anisüngzüktsü lia pai Muslim aser Hindu nunger dang October 18 tashi nungbo iba ken o latettsü metetdaktsür.
Chief Justice-i aniba judge pongui akümba Constitution bench kati anogoshia Ayodhya ken o angadanga arudar.
Hindu aser Muslim nunger napronglai Ayodhya nung mangatettep li acre 2.77 ji parnok meyong ta ashir.
Muslim parties-i Hokolbar tashi nung parnoki ken o ajak agütsütsü ta shiogo. Ano külen SC-i Hindu parties dang Hombar aser Mongolbar tashi nung telangzüba agüjang ta shiogo. October 2 ya sodi anogo asütsü, iba sülen Brihostibar aser Hokolbar nung Muslim parties-i telangzüba agütsütsü.
Supreme Couirt-i October 4 tashi nungbo ken o ajak angadangner aser Dusherra benjung sülen October 14 nü tanaben iba ken o angadangba sülen October 18 tashi nungbo iba ken o nung obendang agütsüner.