Jakhama Block kübok VCs nem tzü filter agütsü

Jakhama, Rongjui/September 26 (TYO): September 26, 2019 nü Viswema nung single use plactic nokdangba indang awareness campaign ka ayongzüka agi aser iba sentong nung Jakhama sub-division kübok district administration-i Village Council shia nem tzü filters lema agütsü, ta ketdangsertem osang ka ajanga metetdaktsü.
Senden aser lokti sentong balala nung single use plastic tzü pongdang mamshitsü ajungshia Village Councils nem tzü filter agütsür.
Jakhama Block kübok yimtsüng balala nung plastic nokdangtsü atema yimsüsürtem, lanur lenirtem, shisaliok reju ketdangsertem aser tetsür tentettem den awareness campaign agia arudar.
Mezüngbuba shilem nung tzü litre 20 dak tajemba mineral water bottle amshiba aser ayokba nokdangtsü aser Styrofoam-i yangluba polythene bags, disposable plates aser cups nokdangtsü.
Iba sentong nung jembidang SDO(C) Jakhama, Alemyapang Longchar-i, Jakhama block ya shisaliok aser hospitality industry tiyongtsü tesem ka lir, anungji asenok yakbang ser iba campaign nung shilem agitsüla, kechiyong state semdanger raliwalir timbakati iba tesem semdanger, ta metetdaktsü.
Dr. Asano, MO Jakhama-i plastic ajanga meimchir aser tzü mopung nem timtem balala agütsüba metetdaktsü.
Laisa asenoki plastics maliyonga taküm litettsü ajisüaka plastic amshiba ajanga asen temang nung timtem balala agütsüba meteta alitsüla, ta shisem.
Kasa sentong nung Virhelie Kruneilie, Consultant, PHED, Kohima, Village Council Chairman, Viswema aser VCC Khuzama-ia jembia liasü.