PMC bank tenokdangba anema nüburtemi vote magütsütsü amokmerener

Mumbai, September 27 (Agencies): Maharashtra Cooperative (PMC) Bank nung sen telatet ka dang agizüktsü melaba anema bank account alirtemi taruba assembly elections nung shilem magitsü, ta amokmerenogo.
PMC Bank account holders aikati social media ajanga Ato kilonser, Narendra Modi dang, “PMC bank-i deposit asürtem atema meinyakra onoki October 21 nü vote magütsütsü,” ta metetdaktsü.
PMC bank account alirtem dang sen 1000 dang agizüktettsü atema sangdonga liasü, iba sülen Mumbai nung aliba Sion branch kima nisung aika adenshia longkak ait. Nüburtemi longkak aitba nung ajemdaker Brihostibarnü Reserve Bank of India (RBI)-i sen agizüktettsü telatetbaji sen 1,000 aliba nungi sen 10,000 kümtsüogo.
“Sen deposit asürtem timtem pungbatsü atema telatetba reprangshiogo. Sen deposit asürtem timtem pungbatsü atema RBI-i maneni reprangshia telemtetba agitsü,” ta RBI-i sangdong ka nung metetdaktsü.
Hombarnü RBI-i PMC Bank nung ita 6 atema tenokdangba agüja account shia sen 1000 dang agizüktettsü atema latetja liasü, iba denji külemi PMC bank dang loan renew mesütsütsü, invest masütsü aser deposits magizüktsü tuyua liasü.
RBI-isa Banking Regulation Act 1949 nung ajemdaker PMC bank board of directors anentsüba sülen incharge atema administrator ka shim.
PMC Bank ya multi-state scheduled urban cooperative bank ka lir aser iba bank ya Maharashtra, New Delhi, Karnataka, Goa, Gujarat, Andhra Pradesh aser Madhya Pradesh state tem nung amenoka lir. PMC bank kongsang 137 lir aser linük nung top 10 cooperative banks rongnung PMC bank densema lir.