Medziphema nung EAC Sentilong den tepila sentong agi

Dimapur, Rongjui/September 27 (TYO): September 27, 2019 nü Medziphema ADC office nung Medziphema Sub-division-i EAC, Sentilong Ozukum den tepila sentong ka ayongzüka agiogo, ta ketdangsertem osang ka ajanga metetdaktsü.
Iba sentong nung jembidang Sentilong-i pa nüngtem nung tepila sentong ayongzüka katsüba atema department dang pelaba lemsatep. Paisa küm 2 ser ita 4 tashi Medziphema nung EAC inyaktsü maongka anguba atema pelar, aser toktsür aotsüsa akümba atema sasar, ta ashi.
Paisa ADC-i akokba tashi amalitepa inyakba atema pelar; ADC dang nungi pai aika angazükogo, ta metetdaktsü.
Paisa Dobashies aser staff temi pei mapa angateta inyakba atema pelaba lemsatepba den külemi ano temerangba inyaktsü ayongzük.
Sentilong-isa MTC-i mapa tajung inyakba aser department ajaki amalitepa inyakba ajanga pa mapa ajak sadema inyaktetba atema pelaba lemsatep.
Kasa sentong nung Hoikhochang Ministerial staff, Murdeedharan MTC, Akhotuo Kuotsu president Medziphema, Kedokhrielie aser DB’s-i tepila o jembi. Parnok ajaki, Sentilong ya ajungmesor ka, mapa nung kanga temerang, taochi aketba aser Tsüngrem tsübuba ketdangser ka liasü aser nüburtemi pa dang nungi tajung aika angazükogo, ta lemsatepa liasü.
Parnokisa Medziphema Sub-division nung posting arur ketdangsertem rongnung mapai tenendaktiba aruba ketdangserji pa liasü, ta metetdaktsü.
Iba sentong lenir, ADC Thovisie Phoji-ia Sentilong-i kanga nendaka inyakba atema pelaba lemsatepba den külemi pai ajangshiba ketdangsertem rongnung tajungtiba Sentilong liasü, ta kuli asü.
ADC-isa, pai Sentilong dang nungi tajung aika angazükogo aser pai Administration den Medziphema nüburtem atema tenla mapa tajung inyakogo, ta shia posting tasenba junga inyaktsü atema moaja liasü.