Senso onük

Senso ka asoshi temetentem rongnung senso temeten yasa tuluba aser tematiba asütsü. Ibayongji senso temeten indang jembidang aiben asenok rongnung meputep adoker, kechiyong ajaki senso temeten aginür saka shitakba sensosangertemi bendangertem nem tapi agibo senso temeten magütsüner. Tang India nung BJP teloki aniba center government-i tatar hoho nung benoktsü anendaka aliba ken o kaji, bendangertem nem senso temeten agütsütsüba onük lir. Iba onük dang Citizenship Amendment Bill (CAB) ta ajar. Atangji, iba tebilemba onük ya BJP telokibo taküm küm election magidangsa temzüng ozüng küma latetnüa liasü saka, talisa, Northeast nung alirtemi iba tebilemba onükji anema kanga sashia apusoba agi Lok sabha tashi nung jembir, Rajya sabha nung mejembi ayu. Ibaji, tang shia arua jembitsü apusor. Atangji, iba onük ya benoka temzüng nung enoktsü asoshi Rajya sabha nung mebenoki soita yuaka, election mapang nung BJP teloki kanga sashia indangindanga nokdakba kaji, anosa BJP teloki government kümtetra, CAB onük ya asangsang nung temzüng ozüng küma amshitsü ta yimjak nung jembia jajaba onükji liasü. Iba sülen BJP teloki takok tulu ngua government kümogo. Ano, tesüngmangtsü kaji, CAB onük anema sashia nokdakdak, Northeast state ajak nung BJP teloki takok tajung angu. Iba jagi yimdong nung kar asar dang ashi, shitakba nungbo nübortemi CAB onük ya temzüng ozüng küma latetdaktsüner ta ashitsüsa yimten tensa tia ka nung Northeast odagi. Ajisüaka, BJP teloki metettsüba kaji, Northeast nung nübortem teimbakati BJP telok yaribaji, CAB agizükba tamaitsü masü saka BJP dak alaka tang tangbo tanga telok nem  India madak yimsü mesüdaktsüner, Congress agi alak aser tanga yimten teloktem dak temulung melemtetter ta asüba putu ka nung, tang BJP teloki nübortem dang nungi iba maongkaji agir. Anungji, election result nungji dang metaloker, center government-i tenük amur dang CAB ya temzüng küma latetra, ashiko, Northeast-bo India nungi piladi ta asütsüa akok. Joko, Mizo aser Manipur nungertembo CAB onük anema ola adok tenzükogo. Aji oda, North East Forum for Indigenous People (NEFIP) teloki CAB onük anema October 3, 2019 nü Northeast ajak nung longkak aittsü lemteta aliba sentong nung Manipur nungbo tongtibang lokti ajaki shilem agitsü lemtetogo. Ano, Mizoram nunga, October 5 nü kilo kilonser Amit Shah Aizawl-i aruba mapang Mizo kaketshirtem telongjem, Mizo Zirla Pawl teloki anir kaketshir aser lanurtem tayimtsü anendak nungi Aizawl town tashi lenmang songa süoshi tanak agir atatsü aser kilo kilonser süiba mapang CAB onük magizüktetba aser mepelaba tamaitsü sayua wako tanak ayiploktsütsü telemtetba agiogo. CAB nükjidong ya Bangladesh, Pakistan aser Afghnanistan limatem nung tamangba yimsü tenüng nung tali majung reshikangshi ajurur Hindu, Khristan, Sikhs, Budhists, Jains aser Parsis nungertem nem India nung senso küma alitsü asoshi senso temeten agütsüner. Tetezü item Muslim limatem nung alir Muslim nunger masüba nübortem shirnok Muslim yimsü dak mamangba agi timtem ajurur, parnokji India nung lidakja senso agütsüner. Iba onük ya tangatsübo junger, saka iba onük ya kodang temzüng küma latetdir, item limatem nung alir , tanga yimsü amangertemjibo yutsür, Hindu nunger aika India senso küma alitsü aser parnokji teimbaka Northeast nung arua chirema alitsü. Shitakba nungbo item limatem nung Hindu nungertem dak alaka tanga yimsü Khristan, Sikh aser Budhists yimsü amanger aikabo mali, anungji shitakba nükjidongjibo Hindu nungertem Indiai anir arunerba asütsü ta ajaki temulung melembi bilemer. Tanga Nagaland nung shishilembadak aser government contract aser supply mapa nung asenoki meteta aser memeteti asen rongsen bendenertemji Hindu nungertem lir, Muslim nungertem yabo asenok mapa inyakdaktsütsü asenoki jaokba ayangertem lir. Itemji meteta asenoki yimten onüktem nung saksalema shilem agitsübaji kanga tongtibang kümogo. Ibaibo political party otsü masü saka senso onük lir, anungji senso ajaki party otsü tesülen yutsür, bendangertem nem senso agütsütsüba onük yabo yimkong tebilemtsü kümer nokdangtsüla.