ANEFWA-i October 3 nungi lungkak aittsü

Dimapur, September 30 (TYO): All Nagaland Electricity Field Workers Association (ANEFWA)-i züngsem ajak dang pei pei district HQ nung adenshitsü aser October 3, 2019 nungi state ajungalen lungkak aittsü atema renemtsü tetuyuba agütsüogo.
ANEFWA-i July 23, 2019 nü state sorkar nem shidi ka nung onük pezü takhangba agütsü aser iba sülen September 2, 2019 nü takhangbatem mapa küma inyaktsü atema mapang latettsü. Ajisüaka, sorkari onük ka danga agizüka meinyak, ta ANEFWA-i tanü sangdong ka nung ashi.
Parnoki akhangba onüktemji- (1) promotion atutsü indang küm atsüzüktsü (2) W/C appointment noktanga aliba agientsü aser W/C and Casual Employee Commission-i ashiba ama W/C nübo ayutsü(3) field staff 266 indang post creation & regularization mapa meinyakba (4) power department kübok regular employees den kasa W/c employees nem risk allowance agütsütsüba lir.