Aruncahal nung ENNG-i TCL PeF senden nung madentsü ayongzüker

Bordumsa, September 30 (Agencies): Eastern Naga National Government (ENNG)-i Tirap -Changlang -Longding (TCL) nung alirtem dang Tirap, Changlang and Longding People’s Forum (TCL PeF)-i ayongba senden nung madentsü ayongzükogo.
TCLPeF-i ayongba sendenji Changlang district headquarters nung October 4, 2019 nü amentsüba lir.
TCL nung alirtemi iba senden nung madentsüla kechiyong TCL PeF nung pro-NSCN (IM) pusemer kar lir ta ENNG-i ashi.
TCLPeF-i NSCN (IM) pusemtsü atema mapa inyaker. Taoba mapang Deomali nung onoki TCLPeF indang maparen nung tamakok ngudaktsüogo. Autonomous Council ama onüktem ya TCLPeF ama teloktemi masü saka public-i dang lemtettsü, ta ENNG-isa metetdaktsü.
ENNG nung ketdangpur Tosham Mossang-i Northeast Now den jembidang ashiba agi pai TCL district asem nung alirtem den noktaka lir.
“Tirap, Changlang aser Longding nung alirtemi Autonomous Council balaka meshibatsübaji tim dang aser iba temeten lir. Iba onük jembitsüpurtemji India sorkar TCL nung alirtem asütsüla. Iba onük atema NSCN (IM) mesüra TCL PeF teloktemi nübortem tenüng nung jembitsü makok” ta ENGG-isa metetdaktsü.
Miim tebilembatem bener TCL nung nübor anisartem memerenshii ang malitsü, ta parnokisa ashi.
September 26 nü TCLPeF-i sangdong ka nung October 4 nü Multi-Purpose Community Hall, Changlang nung TCL district tem nung yimjung, security, terenlok aser autonomous council onüktem jembitsü ayonger ta metetdakja liasü.
Iba senden nung Tirap, Changlang aser Longding district tem nungi minister aser MLA tem (taoba aser tang teinyakdak), public lennir tejentem, kaketshir teloktem, civil society tem, teintet rogotem aser Panchayat züngsemtem adentsü imlar, ta TCL PeF president N. Changmi-i sangdong nung ashi.