Assam Rifles-i NSCN- K Kilonser ka apu

Dimapur, Mongputeni/October 01, 2019 (TYO): September 29 nü Assam Rifles-i Hotel Tourist Lodge, Dimapur nung NSCN K1 (Yung Aung) SS Kilonser Imti Ao puogo.
Dimapur railway station temeket nung NSCN K1(Yung Aung) SS Kilonser Imti Ao munga aliba osang tejangja ka angazükba sülen Assam Rifles aser Nagaland Police na senteper September 29 nü iba tesem mita ao.
Hotel Tourist lodge mita aoba mapang SS Kilonser Imti Ao den NSCN K1 OGW ka apu. Tena ket nungi pt 22 Pistol ana den injang 15, pt 22 mm Fired case ka aser tashishitsü aketba kaket (extortion slips) teku bener lia puogo.
SS Kilonser Imti Ao ya ozüng alema senotsü saruba, Security Force tem inyakyim jusatsüba, prangbong injang shibelenba aser tashiyim agi züngsem aniokba maparen nung densema liasü aser pa tenokdangba agütsür aliba NSCN K1 telok nung public information representative ka liasü. Sepaitemi apuba nisung ana den tena ket nungi putetba osettem ajak East Police Station, Dimapur nem bendanga agütsüogo, ta ketdangser sangdong ka ajanga metetdaktsü.