Nagaland sorkari IAS kaketshir 100 nem scholarship agütsütsü

Dimapur, October 1 (TYO): Nagaland Chief Minister, Neiphiu Rio-i Chief Minister Corpus Fund kübok IAS mapa inyaknüba lanur 100 nem sen lakh 82 jungnüa scholarship agütsütsü osang metetdaktsüogo.
Iba ya Nagaland nungi IAS jangrartemi ALS IAS nungi angati coaching agitsü atema lir.
ALS IAS ya India nung IAS Coaching Network tulutiba lir aser India kübok tesem balala nung centre 75 dak tema lir. Centre tem rongnung North East nunga 30 dena lir.
Taoba mapang Arunachal Pradesh, Meghalaya, Tripura, Mizoram aser Manipur sorkartemi ALS den kasa sponsorship agütsüogo.
Nagaland nung lanur 190 nem sen lakh 72 jungnüa Scholarship agütsütsü ta National Sales Head ALS, Prateek Bhattacharya-ia metetdaktsü.
Iba ya ALS CSR Initiative kübok lir aser Scholarship anaji senteper Nagaland nungi IAS mapa inyaknür 290 nem maongka agütsütsü.
Chief Minister Rio-isa Chief Minister Corpus Fund kübok Top 100 students shimtsü aser ibaji Nagaland sorkar indang Reservation Policy nung aliba ama inyaktsü ta metetdaktsü.
Iba Scholarship Exam ya October 12, 2019 nü district Headquarters ajak nung Deputy Commissioner temi ketdangsüa agitsü.
Application form temji October 3, 2019 nungi Deputy Commissioner office tem nung angutsü aser October 10 tashi nung form agütsütsüla.
Tatidang indang result ji October 16 nü sangdongtsü aser October 21 nungi training tenzüktsü.
Kaketshirtemji Kohima, Dimapur, Mokokchung, Zuhenboto, Wokha aser Mon nung lapoka aliba Authorised Learning centers nung VSAT Technology ajanga training agitsü.
Maneni ALS-i Delhi nungi Academic Mentor tem Nagaland-i yoktsü asr parnoki tesayubatem agütsütsü aser ano Nagaland nung tang teinyakdak IAS/IPS officers-ia ita shia kaketshirtem den ajurutepa ajungshitsü.
Nagaland Chief Minister-i iba mapa tajung inyakba ajanga Nagaland nung lanurtem melenshitsü aser tarutsü nung Civil Services nung takok tajung angutsü ta ALS-i metetdaktsü.