5buba Back to God Bible camp Oct. 23 nungi Pruzhie nung alitsü

Kohima, Mongputeni/Oct. 04 (TYO): Küm shia anogo pongu-ngu amungba 5buba Back to God Bible Camp ya “For I have a plan to prosper you” (Yerimia 29:11) omen nung amendaker October 23 nungi 27, 2019 anogotem nung Naga Shisha Hoho Prayer Centre (NSHPC), Pruzhie, Kohima nung ayongzüktsü renema lir.
Osangbener senden ka nung jembiba mapang NSHPC, Director of the Call of God Ministry (Kekelie Kro-u), Daniel Seb-i ashiba agi, Seminar, Camping, Open Street Mission, outreach mission amala Tsüngrem sentongtem rongnung ministry ajanga iba Bible Camp ya 5buba ayongzüker.
Temesepba miim mozü achir aser technological addiction nung alirtem, kibong nung tebilemtsü alirtem, sarasadem aser counseling nüngdakertem anüla tsütsü Tsüngrem anasai anir arutsü nükjidong nung 5buba Back to God Bible Camp ya Call of God Ministry ajanga ayongzüker, ta Seb-i ashi.
Iba camp aliba mapang camp nung adener asoshi angadi medical camp katsütsü aser kasa mapang sarasadem aser tanüla chiyongtsütem agütsütsü.
Anogo pongu agitsü aliba camp ya ministry ajanga sponsor asütsü, kong registration, chiyongtsü aser mejangtsü atema angadi asütsü. Iba camp nung nisung 120 nungi 150 tashi dang dentettsü, anungji tetsür aser tebur mezüng arurtem nem maongka agütsütsü.
Iba camp nung adentsü asoshi form ya MC Enterprise, Ura Academy Complex, Opp. Axis Bank, Kohima nung angutsü aser KK. Mughavi Chishi den-a 9612139122 ajanga tongtepratep sütettsü. Maneni tejangrartemi Pastor Vezokho Vero-9436071614, Director-9612574861, Camp Secretary-8837014575 nunger dena tongtepratep sütettsü.
Form agütsütsü asoshi October 15, 2019 anogo ya tatem asütsü, aser Kohima nung alir dak alaka iba camp nung adentsü jangra alirtemi sentong ayongter den tongteprateptettsü.
Iba sentong nung tanüla ain aketer, shisalen sayur nübu tejentemi shilem agitsü, ta ministry indang secretary ajanga ashi.
Call of God Ministry ya NSHPC Pastor Vezokho Vero ajanga amenokba lir.