Tangar Sempadaktsüba

Ali pokli nungi tanü tashi tamangba yimsü, oshi-open aser kin nung ajemdaker kin kati kin ka anema apusoba aser sempaba ajanga nisung jenti süogo. Akhidang Egypt nungeri pei lima nung Israel nung sempaba ajanga alar tia nung reshikangshiba otsü asenoki Laishiba nung angur. Aso 20buba nunga World War II mapang Germany nung dictator, Adolf Hitler-i Yihuda nunger sempaba ajanga Yihuda nunger million 6 dak tema tepsetba densema Europe lima tesem balala nung tesempa agi Yihuda nunger jenti tepsetba asenoki putiotsü nung azünger, aser tanü tashi alima kin aikati Yihuda nunger sempar, koba dang ‘Anti-semitism’ ta ajar. Yamaji India nunger putiotsü nunga Muslim nungeri tesempa agi Hindu nunger tepsetba aser Hindu nungeria Muslim nunger tepsetba tatalokba aika lir. India nunger nüchiso anguba sülen-a 1984 küm Sikh nunger meyirjang aika tepsetba, 2002 küm Gujarat nung Muslim nunger 800 jungnüa tepsetba aser 2013 küm Uttar Pradesh nung Hindu aser Muslim nunger tsüngda rara adoka nisung 60 dak tema asüba densema tatalokbatem aika lir. Tesempa o mejembitsü aser tamangba lokti tsüngda rara adokdaktsütsüsa o mejembitsü asoshi temzüng ozüng lateta lir, ajisüaka yimtenren lenirtemi tesempa o jembia ajungmesoba ajanga tamangba lokti tsüngda rara aiben adokogo. 2014 küm Centre nung Narendra Modi-i aniba BJP sorkar aruba sülen loktii nisung aika tepsetogo. Ano külen Modi sorkar kübok tamangba yimsü nung ajemdaker India nung tesempa agi minority tem reshikangshiba tatalokba kanga bulua kümogo; 2015-2018 küm kija nunga India nung Hindu nungeri Dalits, Christians, Muslims aser Adivasis anema tesempa agi inyakba tatalokbatem 721 liasü (Amnesty International India). Hate Crime Watch-i ashiba agi, 2014 küm tashi nungbo tamangba yimsü nung ajemdaker tesempa agi inyakba tatalokba ishika dang liasü. NDTV study ka ajanga ashiba agi, tesüiba küm pongu nung tesempa o jembir 45 tang Union sorkar nung lir, aser parnok 45 nungjagi 35 bo BJP lenirtem lir. Tawa Union Home Minister, Amit Shah-i, India tesem ajaklen NRC mapa küma benoktsü saka Hindu, Buddhist, Sikh aser Jain refugees ibo India nunger senso aser temeden ajak angutsü, ta jembiba o nungji tamangba lokti karbo mezüngokba nungji tashishitsü keta lir. Tamangba lokti, oshi-open aser kin temeyoktep aika aliba India ama linük ka nung tesempa tatalokbatem kanga bulura iba ya ajanga kobi melii lendong tulu adoktsü ana nung lir. Kin kati kin ka sempaba aser mesüra kin kati ka sempadaktsütsü ajungmesobaji nisungtem asoshi lendong tulu. Hitler merenba mapang nunga pai Germany nunger nem Yihuda nunger sempadaktsütsü asoshi jembia Yihuda nungerbo shiruru-a memeyong million aika tepsetogo. Ibaji mesüaka tanü yimten lenirtemi kin kati ka, tamangba lokti kati ka  sempadaktsütsüsa lanurtem ajungshira iba jagi India anüka ajasatsü. Putiotsü nungi tansütsüla.