Lisopur Oshioben

~ K. Temjen Jamir.

Küm shia August 9 ya ya alima ajunga nung United Nations-i anir Lisopur Anogo (International Day of World Indigenous Peoples) amonger.Iba anogomung ya 1982 küm United Nations-i alima nung lisopurtem jenjang bushidanga inyaktsü asoshi sentong tenzükba anogo lir. Iba sülen 1995 nungi 2004 tashibo United Nations-i kanga temulung agüja alima lisopurtem jenjang küm ter agia asadanga anepalutsü asoshi ‘International Decade of World’s Indigenous Peoples’ asütsü ta lemteter lisopurtem jenjang ajungkettsütsü asoshi alima tesem ajaklen sentong tapu balala ayongzüka agiogo. Küm shia, iba lisopur anogo amungtsü asoshi omen kaka shimtetter aser taküm 2019 küm asoshi shimtetba omenji ” Lisopur Oshioben (Indigenous Languages)” lir.
Iba omen nung ajemdaker, asenoka alima ajunga den külemi tanü asenok nem Tsüngremi ojalatem bang ajanga agütsüba asen Ao oshioben tia indang asadanga amonger. Tanü yamai asen tetsü oshi mesamdaktsüi wazüka ayutsü atema shisalemsateptsüsa United Nation-i asenok nem mapang tajung ka bener arutsüba asoshi UN nung lenirtem dang kanga peladi. Alima nung oshioben indang bushidangertemi ashiba agi, tang ya alima nung nisungtemi jembiba oshi ajak agi 7000 shi lir. Ajisüaka, item rongnungji Naga nungertemi jembiba oshi amala yabo aika züngoka malitsü südi ta bilemer. Aji shitak süra, alima nung nisungtemi jembiba oshi ya meyirijang tenet dakjibo tali asütsü.
Item oshitem rongnungji oshi aika alima nung tejembir mali samatsüsa ana nung lir. Northern America kisüng nung 1600 küm nungi tang tashi nung America nunger lisopur oshi 52 shi samaogo aser ano tang alima nung jembiba oshitem rongnung pei tetsü oshi jembir nisung lakh ka dak tajemba aliba oshiji 90 % lir. Tetezü oshi 7000 rongnungi oshi 6000 dak tali tesamaleni odagi ta asadangtetter. Item rongnungji, temulung ashitsüka, oshi 45 bo tejembir nisung kaka dang lir, anungji nisung kaji süadokerbo tejembir mali samatsü. Iba denji atongsema nisung 50 dak ishibai jembiba oshi 357 lir, itemjia memenui samatsüsa lendongbang nung lir.Alima nung lisopurtemi jembiba oshi repranga lia samaba oshi kaji, tang US nung Oklahoma state nung alir Yushi kin asütsü. Parnok ya akhidangbo Tennessee state nung par Yuchi oshi jembia liasü saka kodang US goverment-i alima aso 19 buba tetenzüklen kangshia parnok Oklahoma state-i bener aru, parnok chirnurtem nem kaketreju nung government-i par lisopur Yuchi oshi mejembidaktsü aser jembira temerenshisa agütsü, ibayongji temerenshi nungi jenbutsü asoshi Yuchi oshi mejembii English dang jembi tenzükba nungi lisopur agi lisopur masü küma tangbo Yuchi oshi maka nungji alima nung Yuchi nunger mali kümogo. Ano, oshi samaba maparen nung temenungratsü otsü kaji, Alasaka, US nungsa Anchorage ta ajaba tesem ka nung kenü arishi küm 89 tain tantsür ka tenüng agi Marie Smith Jones süadoker, la den kinungertem asüpila sentep alibaji la den dang masü saka par oshi Eyak dena asüpila sentep alir amai liasü, kechiyong la ya Eyak kin rongnung Eyak oshi jembir tesüsabuba liasü.
Tangbo joko US nung Yuchi aser Eyak nunger ajakji lisopur masü saka tesü arur English nunger den kasasa kümogo. Alima nung Tsüngremi agütsüba tetsü oshi mejembiba ajanga meteta aser memeteti pei kin aser pei sobaliba ayak yamaji samar. Item denji asenok Aor Jungli Mongsen oshi jembirtem jenjang medemdanga shisalemsatepa ajungshiteptsü kanga rongdak nüngdaka kümogo. Iba lendong aser takoksaji tajungba angatettsü atema, tanü asenoki asen tetsü oshi Chungli Mongsen ajak amadoker, tsümar oshi dang jembiba agi tsümar ama küma aoba tia ya ken jungjunga bilemdangtsüla. Atangji, asenok asoshibo osang tajung kaji, asen tetsü oshi tajungba küma jembia shia arudaktsütsübaji tanüa temenu masü. Joko, asenoki asen oshi ya ‘dialect’ masü saka ‘language’ tongtibang ka ta bilema tali tajungba nung jembitsü, zülutsü aser ken mejema atentsü merangdi. Oshi samaba den kin samaba otsüji bilemdangra, temulung ashitsüka lir. Joko ibaji shingaia meyipa bener marutettsü. Asenoka iba jenjang jagi maitsüsa asen oshi meraketdakja jembidi aser ajungketdi.