Chakma teloki Amit Shah dang teyari meshir

Guwahati, October 4 (Agencies): Union home minister Amit Shah-i Mizoram semdangtsü anogo ka lia All India Chakma Students’ Union (AICSU)-i pa dang Jawahar Navodaya Vidyalayas (JNVs), Mizoram nung Chakma kaketshirtem reshikangshiba onük jembiang ta ayongzükogo.
Mizoram kübok Serchhip nung aliba JNV nung azünger Chakma kaketshir 34 tashi tawa tu Mizo kaketshirtemi reshikangshiba atema toktsür, kidangi jena ogo, ta osang ajanga ashir.
September 26 nü Mizo kaketshirtemi Nolin Bikash Chakma reshikangshiba sülen Chakma kaketshirtemi school toktsür jena ao ta AICSU-i ashi.
“Chakma kaketshir 34 rongnung 17 Lawngtlai district aser 17 Mamit district nungi lir” ta AICSU tatong tir Tejang Chakma.
JNVs nung Chakma kaketshir reshikangshiba tang tasen masü. 1997 küm JNV ketdangsertemi Chakma kaketshir 43 tashi Manipur kübok Mao Gate nung aliba JNV-i anien. Hrangchalkawn nung aliba JNV hostel nung Chakma kaketshirtem reshikangshiba agi iba ya inyak ta Tejang-i ashi.
Shisaliok rejutem nung reshikangshiba anentsüla aser JNV, Serchhip toktsür aoba kaketshir 34 prongla meyipa anir arutsüla, ta paisa shisem.
Centre sorkari lapokba school nung kaketshirtem kümzüka ayutsüsa Union home minister-i mapa meinyaktetra, ibaji India sorkari tanurtem kümzüka meyutetba mapa ka asütsü” ta Tejang-isa metetdaktsü.
AICSU-isa tekaratiba nung Marpara, Lunglei District aser Kamalanagar, Chakma Autonomous District Council nung JNV ana lapoktsü atema takhangba agütsü.