Europe-i aruba refugee nisungtem menokdangtsü: Asselborn

Ankara, September 19 (Agencies): Pei linük toktsür Europe nung jenoka alitsü nükjidong nung Europe tonga aoba refugee nisungtem menokdangtsü lemtetba osang ka European Union (EU) Tir, Jean Asselborn-i yashi Hokolbar nü metetdaktsüogo.
Turkey Foreign Minister, Feridun Sinirlioglu den aroki osangbener den Ankara yimti nung ajurutepdang Luxembourg Foreign Minister mendena abensang, Asselborn-i iba olenji metetdaktsü.
“Europe-i refugee nisungtem nokdangtsüsa ozü arrtsü meshibangtsü. EU nung züngsemba linüktemi Europe bushia aruba refugee nisungtem peisasep yari anioktsü renema lir,” ta pai ashi.
Tang refugee nisungtem den sentakba khuret tulu benokba Turkey sorkar nem senotsü teyari agütsütsü asoshi EU-i nungdakba maparen inyakba osanga jangjaogo.
Asselborn-i yashi Sinirlioglu den ajurutepba sülen pai Germany Foreign Minister, Frank-Walter Steinmeier dena maneni Ankara yimti nungsa ajuruba osang jangjaogo.
“Turkey o Germany napronglai tang Europe-i ajurutsü tenzükba refugee nisungtem den sentakba khuret benoka lir aser kasaji tarutsü mapang nunga benoka Europe ajunga den yariteptsü renema lir. Aji oda, tanüngba EU nung züngsemba linüktemia Turkey o Germany na nungi ajizüka pei pei linüki refugee nisungtem anioktsü ajungshir,” ta Sinirlioglu-ia yashi metetdaktsü.
Bendanglen talisa, Syria nung sorkar aser sorkar anemer na tsüngda mangatettep ken o tulu adoka tongpang kanga sashia raraba ajanga bener arutsüba lendong balala nungi pei taküm kümzüka alitsü nükjidong nung pei linük toktsüba refugee nisung meyirijang aika tang Europe, talisa, Turkey arrtsülen tonga Europe ajunga nem tebilemtsü khuret tulu agüja aliba osang bushiteta lir.
Ano külen, tang Europe-i ajurua aliba refugee nisungtem den sentakba khuret bentettsü nükjidong nung EU foreign minister-temia taruba Bodbar nü senden ka amentsü ayonga lir.