PM Modi aser Shah nem tenüngsang agütsütsü tetemsü: Mohan Bhagwat

New Delhi, Mongputeni/October 08 (Agencies): Mongolbarnü Rashtriya Swayamsevak Sangh (RSS) tongti, Mohan Bhagwat-i, Arrla 370 agienba atema Ato kilonser, Narendra Modi aser Home Minister Amit Shah na nem tenüngsang agütsütsü tetemsü, ta metetdaktsü.
Nagpur nung aliba RSS headquarters nung jembidang Bhagwat-i, India nunger million aikati mapang talangka nungi akhangba Modi aser Shah nati ataloktsüogo; tenati tanga yimtenren party tem den angatettepa Arrla 370 agienba atema tena nem tenüngsang agütsütsü tetemsü, ta metetdaktsü.
August 15, 2019 nüa Bhagwat-i Modi-i aniba sorkar nem tenüngsang agüja, “Modi denabo ajakji takoktsü,” ta jembia liasü.
Linük nung loktii nisung tepsetba onük nung Bhagwat-i, loktii nisung tepsetba ya India den mapet, ta ashi.
Paisa, “Lokti nung tatalokba kar dang ‘loktii nisung tepsetba’ ta ajabaji linük aser Hindu tenüng menüktsütsü atema lir aser tamangba lokti kar tsübudaktsütsü atema lir. Loktii nisung tepsetba ya India denbo mapet,” ta ashi.
Bhagwat-isa, India ya Hindu linük aser ibaji RSS mangdang lir, ta ashi.
Bharatiyas-i linük sentsüwangshi atema inyaker, ta shia pai, “Linük maitsü dak sendakba nung Sangh nükjidongji tejangja, Bharat ya Hindustan, Hindu linük,” ta ashi.
“Bharat meyongertem, Bharatiya nungi jakzükbapurtem, linük sentsüwangshi atema inyakertem, tesünep atema longjemertem, Bharatiyas ajakji Hindu nunger,” ta pai ashi.
RSS-i küm shia agiba sentong Vijayadashmi nung taküm tongti tejaokerji HCL tentetsang, Shiv Nadar liasü.
Kasa sentong nung Union ministers- Nitin Gadkari, Gen VK Singh (retd) aser Maharashtra Chief Minister, Devendra Fadnavis nungera densema liasü.