Dimapur Süngratsü Students Union hon jubilee mungogo

Dimapur, Mongputeni/October 8 (TYO): Mongolbarnü Dimapur Government College nung Dimapur Süngratsü Students Union hon jubilee mungogo. Iba benjungmung nung Peren, Deputy Commissioner, Sentiwapang Aier alakteta jaoker ama arua aden.
Sentong nung o jembiba mapang Sentiwapang-i, kaketshirtem dang yakyaka alitsü aser tawa tanü amshiba technology tem kanga junga meteta alitsü nüngdaker ta ashi kechiyong taoba mapangtem ama kaketshirtem tang tensa nung imbazümalema kazütsü mapang masü. Paisa, kija aser lokti tentet ajak nükjidong tejangja ayutsü nüngdaker. Ajangtettsüsa nükjidong ayuba ya shisatsü ainba temaitsü lir aser iba ya temulungtetba aser nükijidong tongtettsü atema azüoka inyakba ajanga atalokdaktsütsüla, ta ashi.
Pai ashiba agi, tanübo alima ajak tongtettsü asoshi kichibaji asen kabuma nung lir aser kaketshir ka ama iba tashi amshiyim shidak angazüka amshitsüji asen mapa lir.
Asenoki asen nokdaka aliba jenjang asadanga nüburtem ajangzüktsü asoshi asen nükjidong yanglushitsü aser asen tetsü tebou tem nükla kodaser tongtettsü, iba nung ajemdaker sensak asemtsüla, ta paisa ashi.
Maneni sentong nung Dimapur, Süngratsü Senso Telongjem, tir Rongsenlemba Mollier, Ao Students Union Dimapur tir Moayanger Jamir, Süngratsü Students Union tir Tiongluen Walling aser Students Union mezüngbuba tir Tongpangzenba Longchar, IFS (Retd.) nungeria o tatsütsü jembia liasü.
Sentong nungsa Dimapur Süngratsü Students Union tir, Chubaniksung Longchar-i lokti pelaa agizükba o jembi aser jubilee planning committee, convenor Tsuktiyapang Jamir-i tepela anküp o jembia liasü.