KOKT asayamung tembangogo

Kohima Science College Ground, Jotsoma nung October 7, 2019 nü  KOKT asayamung tenzükba mapang Alemtemshi Jamir aser asayartem den ketdangsertem tangokba noksa ka yangi angur. 

Kohima, Mongputeni/October 8 (TYO): “Strengthening bonds” omen nung ajemdaker October 7 aser 8 nü Kohima Science College Ground Jotsoma nung Kohima Ongpangkong Kaketshir Telongjem (KOKT) asayamung asayaogo.
Asayamung lapokba sentong nung alakteta jaoker Alemtemshi Jamir, CEO, IDAN-i ashiba agi, tanü asüng lanurtemi pei temang anema ayutsü tongtibang ta angateta kanga meranga inyakteper.
“Gym aika lapokogo aser nüburtem aika pei temang anema toktsütsü asoshi temang atsüsa jajar aser asemzür,” ta pai ashi.
Jamir-i ashiba agi, computers, televisions, mobile phones aser interactive game tem kanga bulua amshitepba sülen nüburtem kima yimtong inyakyim nung shilem magi küma odar.
Temang anema alitsü asoshi inyakyim tapet benoktsü nüngdakba indang jembidang pai, iba inyakyim ya külemi shisadangba aser külemi alitsü, inyaktsü aser asayatsü tasa angazükba ajanga takok ngua inyaktettsü, ta ashi.
Sentong nung KOKT tir Imlinokcha Longkumer-i lokti pelaa agizükba o jembi aser KOKT senyur Bendangtoshi Longkumer-i tajungshi o jembia liasü.
Maneni KOKT sports secretary Limasanen Longkumer lenisüba kübok asayamung nung shilem agiba team tem tenangzüktepba agia liasü.
Anogo ana tepiyong team balala tsüngda Football, Volleyball aser basketball asayaa liasü.