NSF asayamung: Chumu Town YO, Kohima Village SU, Centurion FC & Meriema Village YO quarter final-i iogo

Kohima, Mongputeni/October 8 (TYO): Angami Students’ Union-i ayongzüka tang asayaa aliba NSF martyrs’ memorial trophy nung Chumu Town Youth Organisation, Kohima Village Students Union, Centurion Football Club aser Meriema Village Youth Organisation team-i pei tata asaya koka quarter final-i iogo.
Tatembangbuba pre-quarter final asaya ana asayaba mapang Chumu Town Youth Organisation-i Amicis Unitum madak goal 2-1 agi koka liasü.
CTYO asoshi mezüngbuba goal ya Khiusumew (10)-i minute 21buba nung idaktsü aser Limakumzuk (18)-i minute 68buba nung tanabuba goal idakja liasü. Amicis Unitum puria L. Nokoi ajanga minute 68buba nung goal ka idaktsü saka tanabuba goal meküptokteti asaya tembang.
Tanabuba asaya Kohima Village Students’ Union-i tie-breaker ajanga goal 5-3 agi Phesama Youth Organisation madak takok ngua liasü. Atakzüktsür aliba asaya mapang tembangba tashi nung telok kati dang goal magütsütetba sülen tie-breaker asayatsüsa aküm. Asaya nung KVSU nungi asayar Mezhüsietuo nem yellow card ka agüja liasü.
Ano tanga asaya ka nung defending champions Centurion FC nungi asayar Rabindra Meitei (9)-i hat-trick ka agüja parnoki Phezoucha Youth Organisation (PYO) goal 3-0 agi kokogo.
Hombarnü asaya nung defending champions Centurion FC puri Phesama Youth Organisation goal 3-0 agi koka liasü.
Asaya mezüngbuba shilem nung telok kati danga goal magütsüteti tembang saka asaya tanabuba shilem tenzüker minute 2 tsüngda Rabindra Meitei-i mezüngbuba goal idaktsü aser paisa minute 59 aser 70 buba nung goal ana idakja hat-trick agütsü.
Kasa mapang nung taoba küm tanabuba jenjang nung tembangba telok Meriema Village Youth Organisation-i goal 6-1 agi Tyrants FC kokogo.
Asaya nung Meriema Village YO nungi asayar Keneisezo (6)-i hat-trick ka agüja liasü. Pai mezüngbuba goal minute 28buba nung idaktsü aser iba sülen minute 74 aser 79buba nung goal ana idakja liasü. Parnok rongnungisa Vizotuolie (10)-i minute 51 aser 70buba nung goal ana idaktsü aser Rokuovolie Phewhuo (17)-ia minute 66buba nung goal ka idakja liasü.
Tyrants FC pur atema goal ka ya Vinongol-i idakja liasü.
October 10 nü 1buba QF asaya:
Centurion FC vs Chumu Town Youth Organisation @ 1:30 pm
Maneni NSF Martyrs’ Memorial Trophy nung shilem ka ama Angami Students’ Union aser Angami Youth Organisation na tsüngda Bodhbarnü 2:00 ako nungi tenzüka exhibition asaya ka asayatsü.
1st Class Contractor Vilelie Khamo, tetushi tesemdanger ama iba asaya arua reprangtsü.
Asayamung ayongertem sangdong ka ajanga ashiba agi, exhibition asaya asayaba ya lokti tentet anaprongla nungi Angami nunger tem longjemshidaktsütsü asoshi lir. Anungji parnoki lokti tentet anaprongla nungi taoba mapa tenzüka alirtem aser nüburtem dang iba asaya arua reprangtsü asoshi jaokogo, ta Angami Students’ Union tir Vizokho Zashümo aser Information & Publicity Secretary Thomas Khawakhrie nati metetdaktsü.