Women’s World Boxing Championships: Mary Kom quarterfinal-i iogo

Mary Kom (achiji) aser Jutamas Jitpong na asayar sülen tangokba noksa ka yangi angur. 

Ulan-Ude, Mongputeni/October 8 (Agenceis): Women’s World Boxing Championships trokben tashi koker alila MC Mary Kom (51kg) Mongolbarnü kanga meranga asayar quarterfinals-i iogo.
Last 16 nung Mary Kom-i Thailand tsür Jutamas Jitpong 5-0 agi kokogo. Jutamas-i Mary anisüngzüka metoktsüi kanga tejalkleni arua asaya saka lai Mary dak junga metsüngshiba ajanga asaya makok.
Mary Kom iba asayamung mezüngbuba round nung bye angu aser Mongolbarnü asaya nung lai mezüngbuba minute asemshibo la den asayar kanga junga asadanga asayaba sülenang lai asaya amokbanger asaya tenzük.
Mary Kom shiba tang mezüngbuba 51kg division nung medal ka koktettsü asoshi meranga asayadar, lai tanabuba round nungi tajungba asaya tenzük aser talisa counter-attack kanga junga süa liasü.
Ajisüaka taoba mapang iba asayamung nung silver medal ngur alila, Saweety Boora (75kg) pre-quarterfinal nung tsükogo.
Pre-quarterfinal nung Boora, Welsh tsür Lauren Price den asayaa liasü. Price ya European Games gold-medallist lir aser taoba küm kasa asayamung nung lai bronze medal koktetogo.
Maneni la Commonwealth Games champion lir aser European Championship nunga asemben tashi bronze medal nguogo.
Price amala asaya tajung ka den asayatsüji temela masütsü ta Boora-i meteta liasü saka lai takokba tashi tajungtiba asayaogo aser lai Price den toktepa asayatetogo. Ajisüaka tetendangertemi 3-1 agi Price nem takok agütsü.