PAC, NCD-i sashia aitsür

Dimapur, October 08 (TYO): Audio recording ka nung NSCN (IM) tenüng nung nisung ana aser Puja Committee Secy. Dimapur tsüngda jembidang pandal construction atema sen akhangba ajanga PAC, NCD aoksar aser süngmanger, ta PAC, NCD Media Cell sangdong ajanga metetdaktsü.
“Parnok tsüngda jembiba o ajanga züngsemtemi puja pandal yangluba nunga sen akhangba jangjar. Iba ama tatalokba ya Naga nunger atema dang masü saka parnok adenba telok atema-a maaksü tulu. Linük tenzüker, ta jembirtemi iba tashi inyakba ya maaksü. Police aser administration-i sen akhangertemji tekaraba nung jangja ken o benoktsüla. PAC-isa NSCN (IM) dang item züngsem nem temerenshi tulu agütsütsüla aser parnok maitsü den parnok nem agütsüba temerenshiji nüburtem nem metetdaktsütsüla,” ta PAC sangdong nung shia lir.
“Amokmerenba aser sen akhangba ajanga benjung raksatsübaji PAC-i sashia aitsür. Item ama nisungtemi par telok tenüng menüktsüba dang masü saka Naga nunger ajak maaksütsür, anungji lokti tentettem danga iba ya aitsütsü ayongzüker,” ta kasa sangdong ajanga metetdaktsü.