Jamuna Boro aser Lovlina Borgohain na Quarter-i iogo

Ulan-Ude, Mongputeni/October 9 (Agencies): taoba küm World Championship nung bronze medal ngur alila Lovlina Borgohain (69kg) aser Jamuna Boro (54kg) nati Bodhbarnü pre-quarter nung pei tata asaya koka World Women’s Boxing Championships quarterfinal-i iogo
Boro-i fifth-seeded Algeria tsür Ouidad Sfouh tsükdaktsü, shiba African Games gold-medallist lir. Kasa mapang nung Borgohain-i 5-0 agi Morocco tsür Oumayma Bel Ahbib madak takok ngua liasü.
Boro taruba asaya Germany tsür Ursula Gottlob den asayatsü, shibai European Championships bronze-medallist aser seed pezübuba nung alila Belarus Yuliya Apanasovich pre-quarterfinal nung 3-2 agi koka liasü. Iba asaya tembangba sülen referee-i aibelena Apanasovich teka ajungkettsü saka paisa metongshia liasü.
Maneni Borgohain quarter final nung Karolina Koszewska den asayatsü, shibai Uzbekistan tsür Shakhnoza Yunusova koka liasü. Poland tsür Koszewska-i taküm European Games nung gold medal nguogo.
India team nungi Bodhbarnü arishi küm 22 tain Boro mezüng asaya aser asaya tenzükli lai la den asayari atsüngba jung menokdangteti asaya saka asayayonga aoba mapang lai tali tejakdangi arua tajungba asaya tenzük.
Tanabuba aser tasembuba round nung tsüngtepba mapang Boro-i tajungba tsüngshia liasü aser tasembuba round bo Boro-i khenyongi amokbanger asayaa liasü.
“Asaya tetenzüklen ni asaya yimya mangateti liasü saka asayayonga aoba mapang asaya yimya angateta tajungba asayateta asaya kokogo,” ta Boro-i ashi.
Kasa mapang nung Borgohain-i atasaa asayatsü meranga liasü saka Ahbib-i la maneni nongshia asayaogo.
Morocco tsürla yagi Borgohain dak khen aneben bo tsüngshia liasü saka counter-attack nung Borgohain-i tajungba asayaa asaya kokogo.
Tang tashi nung India nunger pongu tashi quarterfinals-i iogo.
Quarter-i aier rongnung M C Mary Kom (51kg), Manju Rani (48kg) aser Kavita Chahal (+81kg) nunger densema lir.