Ethiopia PM, Abiy Ahmed Ali nem Nobel Peace Prize agütsü

Oslo (Norway), October 11 (Agencies): Ethiopia Ato kilonser, Abiy Ahmed Ali-i yimjung atema inyakba atema pa nem Nobel Peace Prize 2019 agütsüogo; Ahmed-i yimjung aser alima linüktem amalitepa inyaktsü atema meranga inyakba, talisa kidanger linük Eritrea den arrtsü ken o bentettsü atema pai junga inyakba mapa tajung reprangteta Nobel committee-i pa nem iba sempet agütsü.
Küm 20 tashi rara aruba sülen Ahmed-i linük nüburtem nem teimla agütsü, ochimashi anema inyak aser linük nung tetsürtem nem temeden tulu agütsü, ta committee-i metetdaktsü.
“Ethiopia nung democracy atema ano teinyaktsü wadang tulu lir, ajisüaka Abiy-i tim lenmang nung anidar, aser pa nem Peace Prize agütsüba ajanga democracy atema pai ano temerangba inyaktsü ajungmesotsü ta onoki amanger,” ta committee-isa metetdaktsü.
“Ato kilonser Abiy-i inyakba mapatem ano metembang, anungji pa nem sempet kanga kera sempet agütsür asü, ta ashishitsü akok, ajisüaka pa mapa tajung reprangteta sempet agütsütsü aser ano taliba ajungmesotsü mapang tongogo ta committee-i lemtet,” ta parnokisa metetdaktsü.
Ethiopia aser Eritrean na tsüngda küm 20 tashi tsükchitepa aruba sülen yaküm Abiy aser Eritrea Tir, Isaias Afwerki nati tesendaktep yangluba ajanga tsükchitep anena liasü. Iba sülen Abiy aser Afwerki nati linük anaprongla yimtiba nung Embassy amenoktsü, linük ana tsüngda tayimtsü senzütsü aser Eritrea nung port facilities amshitsü tezüngzüktep agi.
1901 küm nungi tenzüka lokti tentet 24 densema nija nem Nobel Peace Prizes 99 agütsüogo. Tanga Nobel Prize bo Stockholm nung sangdong ajisüaka Nobel Peace Prize bo akhidang nungi agüja aruba tesem Norway yimtiba, Oslo nungsa agütsü.
2018 küm April ita nung Ato kilonser akümba sülen arishi küm 43, Abiy-i linük nung loktiliba asüngsashitsü aser bendang linüktem den tesendaktep tajung yanglutsü atema inyak. Ajioda ita trok tsüngda-i pai Eritrea den yimjung yanglu, sorkar anema jembir tepoukdak alirtem chiok, yimsüsürtem majungba atema pai tatok meshi aser tamalen yimsüsürtemi ‘kiralongrar’ ta sangdonga linük nungi meindokbapurtem tanaben meyipa anair aru.
Sangküm May ita nung elections agitsü lai pai Nobel Peace Prize agizüker.