Naga nunger alikimong

Nisungtem asoshi alima nung akaba rongsen ajak dang tongtibangtiba aser tematibaji alikimong ya lir. Alikimong kara takar aser alikimong tilaka danga mekara sensaker ta alima nung takar o sensaker na tsüngda bendanger. Iba tangatetba nungji kodang asenok Naga nungertem aser talisa Aortem ali rongsen akaba aser makaba jenjangji asadangdir, alima nung asenoksa takarba ta asangdangtettsü. Alima nung alikimong tilaka danga makaba purtem million aika lir saka Naga nungerbo aser talisa Aorbo alikimong tilakata makaba nisungbo malitsü südi. Talisa, India nunga aluyimner saka ali makaba agi aluyima melitetba sensaker kibong lakh aika lir. Itemji takar lu nung taküm piyong ayanga alir aser aiben pei kibonga memesütet, timtem aser maksü maremtet, soseta asüba otsü asenoki angashir. Naga nunger yabo ali kibur saka sensaker, iba jagi pei akaba ali agi rongsen küma mamshitet timatemer. Asenoki jungjunga bilemdangra, asenoki meteta bendangertem, talisa Nepali aser Meya nungertem, kecha mebeni asen limai aruagi asen lu mesüra asen li nung ayanga alir. Asen li nung alir Nepali nunger kibong kati sen aputepa nashi ka alia nashi mamatsü yoka kibong mesütsü tenzüker. Iba amaji Meya nungertem asen lu nung lia tsük aser aonsutsü lu tapu balala yima takar küma alir. Iba denji parnok lu nung metsüba nashi, nabong, godoru aser an asenoki jenjang tasak agi raktepa alia achir. Parnok asoshibo talitsü ki tilaka songpangtsüsa aser atsü tilaka anepalutsüsa ali tilaka danga ngutetra, ibaji rongsen poktetdak akümer. Ajisüaka, asenokbo parnok ama meranga inyakba nisungtem masü akümba agi, alibo asenok li saka asen li nung züsentetbatem asenoki bendangertem dang nungi alia achir. Ibaji jungjunga bilemdangra, temulung ashitsüka lir. Ibaji dang masü saka akhidang asen tia metetba agi, British nungertemi Naga limai bendangertem shinga temelaba melii atutsü aser alitsü makoktsüsa ILP ozüng lateta yutsüba agi dang ashi, iba ama ozüng ka mali asübo tang yabo Nagaland nung aliba alikimong ajak mesüra tulubalenka pi bendangertem meyong künmer lila. Iba denji ano Nagaland state kümer külen, Nagaland government ajanga 1978 küm Nagaland Land & Revenue (Amendment) Act  latetba ajanga tangar bendangertemi Nagaland nung alikimong alia alitsübaji memelar. Atangji, tangar bendangertem sadema aruagi Nagaland nung melitettsüsa aser alikimonga magitettsüsa ozüng lateta aliba agi, bendangertem pei senotsü bener aruagi industry tapu balala lapoka mapa meinyaktetter. Iba jagi bilemba ama Nagaland nung terenlok mapa meinyaktetba timtem aser tebilemtsü lir. Ibaji khen yimsüsürtemi aser nübortemi shisadangtsü nüngdaker. Ajisüaka, tang tashi Naga nungertema ya alikimong akaba dak alaka pei shisatsü aser tekolok agi pei alikimong nungi rongsen poktetdakja inyaktsübaji matonger aser makoker. Iba jagi ali madakbo kibur saka tanü poksünga mengutet timtemba purtem aika lir. Iba ama tensa ka nung kecha tenokdangba ka mekai Nagaland nung bendangertem dang ali ayoktsü mela nungbo, tang Myanmar artsü tashiji oa yokmatsü. Asenoki bilemdanga inyaktsüba mapa kaji, Nagaland nung ozüng lateta liaka, Dimapur nungbo yashi arur bendangertem aikati alikimong alia teti asoshi kiojen yanglua mapa tulu tenzüka inyaker. Joko, parnokjiang asenok dang nungibo senso tasüba sensopur amai kümogo. Item lu nungji asenok ayanger. Parnokji takar aser asenok sensaker, anungji asenoki asenoksasa rajema menokdaktetra, taruba küm 50 tsüngdabo asenok alikimong ajak parnok keti aotsü. Atangji, asenokibo asen meyong alikimong meyoknütsü saka kodang mekalir, timtem marem, ayoktsüsa akümtsü. Ibaji mataloktsüsa Naga nungertema meranga inyaktsükla aser timtemakasa Naga nunger alikimong wazüka ayutsü asoshi latetba ozüngtem mapa küma inyaktsüla.