Ozüng Metsübuba Takoksa

Alima nung yimteni temzüng ozüng latetba nükjidong ya nisung shinga nema tangar akoksatsüsa aser timtemi idaktsütsüsa meinyakdaktsütsü asoshi inyakba mapa ka lir. Aji oda, senso ajaki kati ka dang meima aser akümtsübutepa lira temzüng ozüng lateta liaka menüngdaker. Ajisüaka, asen lima nungbo asenok aikati asen kija ajangzüktsü aser ajungtsü bilemdang, asen dena senso ajak akoksatsüsa inyaker. Ibayongji, temzüng ozüng ya asen lima nungsa tenüngdakba akümer. Iba nüngdakba jagi office nung mapa tenzüktsüba aser tembangtsüba nungi tenzüka mapa ajak shitak inyaktsüsa temzüng ozüngbo aika lateta lir. Item ozüngtemji senso ajaki tsübua pei pei shilem inyak asübo asen lima ya alima nung tesüneptiba aser topur tajungtiba lima ka kümer lila. Tatishitsü agi, asenoki kaketreju nung shitak tesayutsü sayua tanurtem anepalu asübo, tang ya asen lima nung school mezüngtet ser anenertem tadongokdak maka paikaya yabo mesüla. Ajisüaka, asenoki tanur tajung kümdaktsütsü nükjidong masü saka Education tenüng nung asenokang takar küma anisüngzüka alitsü merangba agi, asenbo terabo ajangzük, saka Naga nunger tanurtem aika ozüng metsübuba senso tamajung akümtsüsa taküm raksadaktsüogo. Item jagi asen lima nung timtem agütsüba agi parnok dang masü saka tanübo asenoka dena timatemer. Asenoki ozüng metsübui inyakba ajanga ozüng metsübutsüsa nisung tamajung aika asenoki anitettertemji, tanü mapa meinyak machimajemtsü chiajema sen meshia senzürtem ya lir. Item timtemji parnok nungi tenzük masü asenoki tenzükba timtem shisabolu tanü asenok ajaki ajurur. Ashi, Education atema aruba senotsü ajak ochishia amshi asübo, asenoki mapang shitak amshia kaketreju nung lesson kanga junga bushir tanurtem ajak tagitsü senso kaka kümdaktsütsü bilema sayu asübo, tanü asen lima nung züngto züngrar mesüra zünger mapa mangu kazürtem ya melila. Ya asenoki yangluba tebilemtsü lir. Iba kasaji asenok yimsüsür aser ketdangsertemi anir nübortem ajaki ozüng tsübua electric light agütsütsü asoshi aruba sen agi asen kija ajangzüktsü memerangi nübortem ajak ajangzüktsü bilema mapa shitak inyaktsü aser light bill ochishia sarutsü aser ochishia agütsütsü ta bilema inyak asübo asen lima nung light tesangwa agi manüngla aser light tashi amshia mapa inyakba ajanga lanurtem aika anisüngzüka litetla. Kasaji, mozü ki atema lemzükba sen shitak amshia mozü kitem anepalu asübo nisungtem sentsü tsüa tangaleni taneptsü bushii kangabo moula aser shirangertema aika mesüdaktsüi aneptsür lila. Ajisüaka, asenoki ozüng metsübuba agi, mozü kitema majunger aser mozü kitem majungba agi asenoka dena sen meindoki taneptsü angutsü melen senbo apusema aika endoker saka nisungbo taneptsü mangu süa adoker. Iba kasaji, asenoki ozüng tsübua gari lenmang yanglu asübo tanü asenok gari dang masü saka temanga ajak raksaa senzüba tia ya majurula. Tanübo asen lima nung gari lenmang majungba agi, asenbo asen ochimashiba menen yari timatemerji kecha masü, saka tangar bendanglen nungi arurtem dang taaker. Parnok den külemi gari ka nung aakba agi mejajaner. Asenoki chiadokba agi asenok kangshir dangji, item timtem aser maksüji ajuruaka, asenok shingaia ola madoker aser item anemaji inyaktsübo ozünga kata mali amato ola kenyongi maka akümba limaji asen temeim Nagaland asütsü. Nagaland akümba agi asenok kar yimsüsür, kar ketdangser aser kar mapa tapu balala nung tajangzük agia alitsüsa maongka nguogo. Asenok ajak ya Nagaland dak mesepertem lir. Ajisüaka, asenok shingaia Nagaland topur ajungtsüsabo meinyaker. Ozüngbo lir saka ozüng amshirtema mali aser ozüng kübok tashi angaa alirtema mali ta ochishia alitsü nangzükli, ochimashi tuluba inyakli; ochishia alitsü ajungshili, ochimashi teimba inyakli; sarasademli aser ochimashi mapatem inyakli ta shingaia ozüng lir ta mali pei inyaknütsü inyaktetba limaji Nagaland kümogo. Iba amaisa ozüng makaba aser metsübuba lima ka kümadoktsü agibo, kari ashiba ama, Nagaland maliang tajungba !