Nashi masü tetsürtem asoshi khuret benang

New Delhi, October 15 (Agencies): Miss Kohima tetoktepba nung shilem agir kati Prime Minister Narendra Modi nem osang tulu ka sangoktsüogo.
October 5, 2019 nü Miss Kohima tetoktepba sentong nung obendanger kati Khrielievienuo Suohu dang “PM Modi-i la den sensaksemtsü jaok nungbo lai kechi jembitsü” ta asüngdang.
Idangji Khrielievienuo-i “India Prime Minister-i pa den sensaksemtsü atema ni jaok nungbo, ni pa dang nashi asoshi masü saka tetsürtem asoshi temulung talila agüja khuret benang ta ashitsü” ta langzü.
Lai iba telangzüba agütsüba ajanga sentong nung adenertem menüdaktsü aser pelaa agizük.
Iba indang video tatsü ka Twitter nung kanga bulua prokshir aser tang tashi nung iba video 60,000 ben reprangogo aser ‘likes’ meyirjang aika nguogo.
October 5 aonung Miss Kohima 2019 tetoktepba nung arishi küm 23 tain Khrienuo Liezietsu-i takok korang angu. La sülen arishi küm 19 tain Khrielievienuo Suohu-i tanabuba aser arishi küm 8 tain Vikuonuo Sachu-i tasembuba jenjang takoktem nguteta liasü.
Taoba küm ishika nashi kümzükertemi nashi shibelenertem dak teka sangshiba aser tepsetba lendong aika ataloka arur aser iba ya nisung aikati aitsür.
Taküm September ita Prime Minister Narendra Modi-i “nisung kari ‘Om’ mesüra ‘nashi’ olongtem angashidang aoksar aser iba atema sasaa bilemer” ta ashi.
“Nisung kari ‘gaay’ (nashi) aser Om olongtem angashidang asükjang moronga aoksar. Parnoki India linük ya Putu 16 buba-i meyipa ogo ta bilemer. Ajisüaka, asenoki shiruru medeni yimtsüng tia nung rongsenkettsüng indang onük jembitetdima?” ta taoba ita Modi-i National Animal Disease Control Programme (NADCP) tenzüktsüdang ashi.