AKM free coaching agirtemi ICIT Mkg semdang

AKM ketdangpuri anir AKM free coaching class agirtemi ICIT semdangba mapang yangji inyakertem den külemi tangokba noksa nung angur. Mokokchung, Oct 16, 2019.

Mokokchung, Oct 16 (TYO): Oct 16 nü Ao Kaketshir Mungdang (AKM) tir, Imkongwatii anir par ketdangpurtem aser tang AKM free coaching class agir kaketshir parnok 35-i Mokokchung nung aliba Institute of Communication and Information Technology (ICIT) campus semdanga liasü.
Iba semdangba ya tongtibangsa kaketshirtem nem communication aser information technology indang shisatsü angazükdaktsütsü nükjidong yur inyakba mapa ka lir, ta AKM ketdangpuri osangbener den jembidang metetdaktsü.
Tanü AKM free coaching class agirtemi ICIT nung aliba library, laboratories aser yangji kechisarena alibatem repranga liasü.
ICIT staff-tem den telungjem aser shisalemsatep senden ka akaba mapang ICIT principal Er. David Tsela-i kaketshirtem pelaa agizükba den taküm nung tamakok ajurudang tezü metangi taruba tatidang nungbo takok angutsüsa lesson meranga aser nentaka azüngtsü asoshi ajungshia liasü.
Yangji inyaker Er. Yibenthung Tungoe-i ICIT indang power point presentation ajanga tatsüka agütsüdang, iba riju ya World Bank-i yaria All India Council for Technical Education (AICTE), New Delhi-i temelaba agütsür 2003 küm lapok, ta ashi. Iba riju ya State Council for Technical Education, Directorate of Technical Education Govt. of Nagaland kübok achaayanga repranger.
Tangji iba riju nung diploma course asem tashi agütsür; Electronics and Communication, Information Technology aser Computer Engineering, item course ajakji küm asem (3 years) agir. Kopi melii ano Electrical tsütsü course tasen ka amenoktsü asoshi maparen inyakdar. Iba den ano Library nung kaket meyi ter dak tema lir aser yangi skill development sentong balala agütsür, ta paisa shisem.
Iba riju tenzüker külen yangi nungi kaketshir tajung aika adoka sorkar mapa aser private company balala nung takok ngua inyakdaki, ta paisa kuli kar bener arua lemsatep. Paisa ICIT nung course balala agiba tajangzük aser ano iba course temer külen shisatsü talangba bushitsü atema luyim balala sayua liasü.
Iba osangbeneri ICIT nung inyakertem dang ‘iba riju nung timtem ajangshiba karbo lir mali?’ ta metetnüa asüngdangdang, ‘state nung industrial exposure tsütsü kanga ajema lir, iyongji kaketshirtem aiben tangaleni anir aotsüsa akümer aser iba atemaji senotsülen tetsükdakba ajurur’, ta tesayur kati langzüa liasü.
Region aser state nung technical education lapoka aliba rijutem rongnung ICIT Mokokchung ya tenungdakbatem (facilities) abensaa aliba aser tajungtiba riju ka ta züngshir. Iba riju ya Ungma lushi nung lir aser Mokokchung town nungi kilometer 12 shi pilar Nagaland University Lumami-i aoba lenmang anasa lir. Iba riju ya taoba Nagaland Chief Minister aser Governor, Dr. S.C Jamiri ali acres 30 shi tenla agütsür asüba lir, ta angazüker.