20buba NSF Martyrs’ Memorial Trophy: ASU-i takok angu

Kohima, Mongputeni/October 18, 2019 (TYO): Angami Students’ Union-i ayongzükba 20buba NSF Martyrs’ Memorial Trophy asayamung final asayatsü aliba anogo ka tejakdang asayamung shilem ka ama Hokolbarnü ASU aser NSF na tsüngda exhibition match ka asaya liasü. Iba asaya nung ASU-i NSF madak goal 8-2 agi takok angu, ta osang ka ajanga ashi.
Iba asaya nung ASU nungi asayar Zekusetuo-i hat-trick goal agüja Naga Students’ Federation (NSF) madak takok ngua liasü.
Zekusetuo-i goal asem idaktsüba den yarisema, ASU nungi asayar Kelhu Khate-i goal 2, aser Vizokho, Avizo Lcho aser Kevisetuo nungeri goal ka ka idakja liasü.
NSF telok atema Dievi Yano aser Ninoto Awomi nati goal ka ka idaktsü.
Asaya tembanger sempet agütsüba mapang, kija telemsa nung ASU nungi Tsituo-i Best Custodian aser NSF nungi Krelo-i Man of the Match sempet agüzüka liasü.
Iba asaya asoshi taoba NSF tir, Kesosul Chritopher Ltu-i senotsü teyari agütsü.
20buba NSF Martyrs’ Memorial Trophy asayamung final nung taoba asayamung takok angur Centurion Football Club, Kohima Village aser Viswemi Football Club, Viswema na tsüngda asayatsü.
Iba asayamung final sentong nung Rajya Sabha züngsem, K G Kenye alakteta jaoker ama aruagi adentsü.
Iba final asaya Honibarnü Kohima Local Ground nung nikongdang 1:00 ako nungi tenzüktsü.