Oct. 25 nü Nagaland Bible College-i ‘Colours of Praise’ ta sür sentong ka ayonger

Mokokchung, Oct 18: Mokokchung town kübok Artang Ward nung amenoka aliba Nagaland Bible College (NBC)-i October 25, 2019 nü nikongdang 5:00 ako nungi tenzüka ‘Colours of Praise’ ta sür kentenmenüba den kechisarena agi Tsüngrem nem tenüngsang agütsüba sentong ka parnok college nung ayongzüka lir.
Iba sentong ya Tsüngremi meimchir nem sempet balala moatsüba ajanga Pa nem tenüngsang agütsüba den külemi college temeket nung aliba kidanger arogo balala den telungjem akatsü nükjidong nung ayonger. Iba sentong nung arogo ter dak tali jaoka lir aser parnoki shilem tapu balala agitsü imlar, ibai angati sayuba sentong ka asünung, tejangrar ajak iba sentong nung arua adentsü pela shishia jaoker, ta sentong ketdangsürtemi osangbenertem den jembidang ashi.
Nagaland Bible College ya Mongchen nunger asür Rev. Chuba Ao aser pa temeim kinungtsü Wt. Tiala Ao (Co-founder) nadi tenzük. Iba riju ya tongtibangsa asen lima alu jenti mena lir, saka teinyaker nübu aparaba tebilemtsü ngua tanela wadang balala inyaktsü asoshi lanurtem anitena parnok nem Yisu Khrista indang tesayuba agütsütsü nükjidong yur “Learn, Love, Serve” omen nung tenzükba lir, ta asür Rev. Chuba’r jala Dr. Sentila Ao shiba tang NBC nung principal lir, lai tebu mangdang kar lemsatep.
Iba college tenzüker arudang yangi nungi Laishir noklang ti (800) shi course balala nung graduate sür ogo aser tang item graduates-temji tenzükba wadang balala nung amdaka lir. Iba college nung ya Theology Certificate, Diploma, B.Th aser M.Div course-tem agütsür. Iba college ya Asia Theological Association (ATA) nung Accredited süa lir. Tangji iba college nung kaketshir tezüngdak pur 80 lir aser iba college ya mission nürangdong yur inyaker asünung, kaketshir teimbaka college-i dang schorlarship agüja züngdaktsür, ta laisa ashi.
Jangratemtsü aser osang tajung kaji; taruba November ita nungi tenzüka yangi Institute of Inter Cultural Studies (IICS) ta sür program tasen ka amenoktsü lir. Iba ya Nagaland nungbo mezüngbuba asütsü. “IICS tenzükbaji talisa bendangertem nem asenok mangdang lemsatepba den Osangtajung mangashii aliba nüburtem tongjemtsü asoshi lir”, ta lai ashi.
“Iba studies ya denomination kecha tebendang makai Yisu Khrista tiyongtsü südaktsür mission maparen balala inyaktsü atema tesayubatem agütsütsü, aser iba ya ajanga taoba mapang asen tsüraburtemi missionary meyi 10 yoktsü mangdang ayuba wadang nungjia yaritettsü aser shilem agitettsü amanger”, ta laisa shisem.
IICS nung shisalen sayurtemji India aser bendanglen nungi teimba lir parnokji; Dr. Basanth Prakash, Dr. Darrell Whiteman, Dr. Daniel Koti, Rev. Dr. Takatemjen, Dr. Max A. Wilkins, Rev. Dr. S.D. Ponraj, Dr. Ravi David aser Dr. Paul Park nungertem alitsü. Iba studies agir mezüngpurji kaketshir parnok 25 lir, ta IICS Coordinator, Limaoneni lemsatep. IICS studies agiba ajanga lenisüba nung tesayuba agütsütsü aser parnokji mission wadang tsütsü tenzüker tajung kaka kümdaktsütsü nükjidong lir, ta paisa shisem.
Iba college nung subject ajak peria lir aser tesayurtema pei luyim (subject) nung takutettem dang lir. Tajung kaji iba riju nung music aser computer class-a dena sayur. Library reprangdangra, library (kaketjen) ki balaka lir aser yangji kaket meyi 10 dak tema aser E-book meyi 50 dak tema lir. Nagaland nung Theological Institute rongnung library tajungtibaji ibai ka asütsü. Tzü mopung ajungba dang masü saka iba college ya town tezülen asünung, benjabenu kangabo mali kaketshirtem shisatsü angazüktsü asoshi metameyong jangratemtsüka lir.