FNR-i angatetteptsü ayongzüker

Dimapur, October 18 (TYO): Naga nunger tetsübu, temulung malemba, terata, telemsa aser kechi tia ajurutsü ta asüba agi amokmerenba mapang, asenoki ochishia, nendaka aser shisa kaa tayongzükbatem koktettsü merangtsüla, ta Forum for Naga Reconciliation (FNR)-i metetdaktsüogo.
“Onoki Naga national groups, talisa NNPGs aser NSCN (IM) dang osangkakettem nung metokteptsü mepishir, kechiyong iba ajanga Naga loktiliba nung timtem bener arutsütsü aser telemsa ang tali adoktsü” ta FNR sangdong ka nung ashi.
Naga yimten tebilemtsü ya kanga dang shisa kaa lemsateptsüla ta bilemer, anungji NNPGs aser NSCN (IM) dang olemtep ajanga mangatettep alibatem angatetteptsü atema mepishir, ta parnokisa ashi.
Naga yimten teloktemi Covenant of Naga Reconciliation sülen anidakba atema tenüngsang agütsür aser iba ama tensa ka nung putepshiba tangatetba nungi masetshii noktaktsü ta onoki amanger. FNR-i shinga tsütsü mashir aser Naga putiotsü aser yimten temeten nung ajemdaker Naga nunger putepshitsü tenangzükba nung noktaka lir, ta parnokisa shisem.