Tatem Makai Ainba -T.Ken 110:1-7

Yimya agi tangar sensaksemba angaa alitsübaji yimya tajung masü, awashi memetetba lir saka T.Ken 110 nung asenoki aji inyaktsü akok ta ashir. Asenoki tebu Tsüngremi techir Tsüngrem den jembiba angashir. “Kibubai kü kibur dang ashi, na kü teka tachichilen menang, ni ne tsükchir ne tsüng ajemmetdak mekümdaktsür tashi” (t.1). Ibai Tasen Lai nung aiben amshiba angutsü, iba yagi Kibuba Yisu Khrista kodang Kotaki meyipa tudir Chuba tachichilen amentsü indang jembir.
Tebu Techir sensaksemba jagi asenok dang kechi ashir? Mezüngbuba iba yagi asen Kibuba tamaren indang ashir. Pa sentsüwangshia kotaki atu. Pai sarasadem, “O Oba, ali meyangludang ne den alidang ni kechi sentsüwangshi liasü iba sentsüwangshi jagi nai pei den ni sentsüwangshidakjang” (Yn. 17:5), aser Tsüngremi aji inyak. Tebu Tsüngremi Techir Tsüngrem nem Pa merenba agütsü, aser Pa tang Kotak nung Chuba- Putir lir. “Na taküm tepiyong putir asütsü, Melkizedek koma yamaji alitsü” (t.4). Tejen Lai putir chuba menden nung amenba asenoki kecha nunga mangutsü, saka Yisu Pa tamarenba nung Pa asen Chuba aser asen Putir lir. Asen chuba ama asenoki kechi inyaktsüla Pai ashir. Asen Putir ama inyaktsü asoshi Pai asenok nem tashi agütsür.
T.Ken 110i ano takok indang jembir- Pai raraji akok. “Na kü tachichilen menang, ni ne tsükchir ne tsüng ajemmetdak mekümdaktsür tashi” (t.1). Iba jagi nai akokba tashi ajemalua akümtsü indang ashir. Asen Kibuba takokba lir. Pai tongpangji akok. Pa Takoker lir, Chuba tem madak Chuba aser Kibuba tem madak Kibur. Idakji asenok asoshi tetsübu mali.
Iba ken yagi ano tenzükba indang jembir. Chuba menden nung amenertemi tangari parnok tenzükdaktsüner. Yisu den yamaji masü. Pai asenok tenzüker.
Tatemsa, ken jagi asenok jenokdak indang jembir. “Pai asenok asoshi mepishitsütsü teti taküm ali nung Pai ajak nung jungjunga parnok kümzüktsü akoker” (Ibri 7:25). Pa taküm ali tashi, asenok taküm alir aser aji teti taküm maka alir.
Khrista chubatem madak Chuba asünung Pai takok angur. Pa Temaba Putir asünung Pa asenok jenokdak lir kechiaser Pai asenok asoshi mepishitsür. Nai Yisuji ne Kümtetdakba ta metetta lir ma? Pa ne Chuba aser ne Putir asü?