Jammu & Kashmir nung kiralongrar asem khaset

Srinagar, Mongputeni/October 23 (Agencies): Jammu & Kashmir kübok Pulwama nung bendanger ana densema kiralongrar asem khasetogo.
Mongolbar aonung Pulwama kübok Tral area nung security sepaitem aser kiralongrar na tsüngda raradang kiralongrar asem khaset. Ki ka nung kiralongrartem atsüka lir, ta osang ka lazükba nung ajemdaker Army, CRPF aser Jammu & Kashmir police senteper telungpur anema operation ao.
Raraba tesem nungi prangpong aser injang aika angu; tang tashi nung kiralongrartem maitsü aser parnok adenba telok mejangjar, ajisüaka par asempronglaji Pakistan nung amenoka aliba Jaish-e-Mohammad telok nungi südi ta bilemer.
Jammu & Kashmir DGP-i osangbener den jembidang, Centre sorkari Jammu & Kashmir nung Arrla 370 agienba sülen mapang tatsüka tsüngda Tral nung civilian ana tepsetertemji kiralongrar asemji liasü, ta metetdaktsü.